Synod Inkhawmpui a tiak; pastor 19 nemnghet
Mizoram Presbyterian Kohhrana rorelna sang ber, Synod Inkhawmpui chu nizan khan a ṭiak.
Nimin khan probationary pastor thawk lai 19 chu Moderator Rev. Lalzui-thanga'n pastor atan a nemnghet a, pro.pastor atana lak thar mi 17-te a dahnghet. Kum 2017-18 Synod budget atan Rs. 2,49,45,63,00 pawm a ni.
Pastor nemngheh thar zinga mi pathum chu Synod Mission Board hnuaia thawk tur niin, pakhat chu Manipur area-a thawk tur a ni a, a dang zawng chu Synod pastoral hnuaia thawk tur an ni.
Pro. pastor dahngheh zinga panga chu SMB hnuaia thawk tur niin, pahnih chu Manipur area-a thawk an ni a, 10 chu Synod Pastoral hnuaia thawk tura an ni.
Synod Inkhawmpuiah hian Inrinni khan rorel chhunzawm a ni a, Synod Executive Commi-ttee (SEC) aṭanga thu lutte ngaihtuah a ni.
Kum 2017-18 budget tur Finance officer Rev. PC Pachhunga'n a pharh chu pawm a ni a; kum 2017-18 Synod budget pumpui chu Rs. 2,49,45,63,00 a ni a, Pastoral-ah Rs. 1,55,70,41,000 leh Mission-ah Rs. 93,75,22,000 a ni. Synod chuan kum kal mek April-Octo-ber 2016 chhungin Pastoral-ah Rs. 50,67,47,633 leh Mission-ah Rs. 40,27,45,995 hmu tawhin, a vaiin Rs. 90,94,93,628 a ni.
Synod Inkhawmpui hian kuym 2015 Synod-a a lo pawm tawh, minister/pastor hna bànsante chungchanga thil tih zui dan tur bawhzuia ruahmanna siam tura tih SEC-in rawtna a siam chu a pawm.
SEC-in ruahmanna a siam, Synod Inkhawmpuiin a pawm tâk dan chu, minister/pastor thawk lai, Synod-in a nemngheh chhan ni lo hna dang - sorkar, politics, firm/corporation, commission, etc-a thawh duh vanga mahni duh thua bángte chu nemngheh rawngbawlna bik kohhran serh leh sâng - baptisma, Lalpa zanriah leh inneihtir theihnate chhawmtir an ni dawn lo. 'Reverend' an nihna erawh chu nungchang azirin an chhawm thei dawn a, inkhawmpui leh committee-a member nihnate an chhawm thei ang. "Pension fund atana ama thawh, a lak theih tur chin Synod Pension Fund danin a sawi te, Service Rules-in gratuity a sawite pek a ni ang a. Superanuation pension, retirement pension, short service pension leh medical reimbursement-te a hmu thei lo ang," tih a ni.
Hetih lai hian, Synod Inkhawmpui chuan kum 2015-a a lo pass tawh, Synod Higher Secondary School behchhana college din a lo pawm tawh chu SEC-in a zir chian hnuah remchang rih loa ngaih a nih avangin, SEC rawtna angin tihpui-tlin a ni dawn lo.
Synod 2015-in a lo pass tawh angin, Mizorama kohhrante inpumkhatna leh thawhhona chung-changa SEC-in rawtna a siam chu kumin Synod-ah hian pass a ni a, SEC bawhzui leh tura dah a ni. SEC-in rawtna a siam dan chu, kohhran inpumkhat leh thawhho a ṭulzia mipui leh kohhran hruaitute'n an hriat theih nan zirhona (consultation/seminar) buatsaih leh kohhran pawl dang hruaitute nen inrawnkhawm hmasak an rawt a ni.
Synod 2015-in Mizoram Presbyterian kohhran mi, fa pali aia tam neite pek tura a lo rel tawh leh SEC bawhzui tura a dah chu Synod 2016-ah hian SEC-in a bawhzui dan a thlen a; Synod Inkhawmpui chuan, "... Zir chian hnuah fimkhur ngai thil tam tak a awma hriat avangin kalpui zel remchang loin a hria a, Synod-ah a rawn thlen a ni. SEC-in a rawn thlen ang hian he thu hi ûm zui zel loh mai ni se, kan ti," an ti.
Synod statistics 2015-16
Presbytery zat 53
pastor bial zat 302
Kohhran zat 1,197
Minister bial vawng 298
Minister bial vawng lo 221
Minister zawng zawng 537
Pro-pastor zat 66
Kohhran upa zat 5,253
Kohhran member zat 6,11,241
Mipa zat 3,00,492
Hmeichhia 3,10,749
Dan zawh kim zat 4,20,043
Thunun mek zat 12,516
Baptisma chang lo 11,852
Kohhran chhungkua 1,29,698
Nau piang zat 9,084
Mitthi zat 3,794