MG Road-ah motor rit phur kal phal lo

Aizawl City Traffic SP chuan Aizawl District Disaster Managment Committee (ADDMA) Chairman leh Aizawl DC thurawn angin thupek a chhuah a; Khatlaah lei a khîk avangin Upper Khatla kawngpui, MG Road-ah lirthei lian (HMV) rit phur kal phal a ni lo tih a puang.

Sorkar thuchhuah tarlan danin, MG Road-a Bible House bula lei khi leh a thlang lama lei khi chu UDPA Minister hoin December 8, 2016-ah enfiah a ni a; MG Road kawngpui pheiah motor lian (HMV) an kal chuan lei a khîk belh a hlauhthawnawm thu leh, motor lian tlân tawh rih lo se tih chu inspection team hmuh dan a ni.

Traffic SP-in thupek a chhuah dan chuan, MG Road-a Bible House zâwn kawngpui sîrah lirthei reng reng dah (park) phal a ni rih lo a, kawngpui pheiah motor lian (HMV) rit phur tlan phal a ni lo. Motor lian rit phur, Aizawl chhim lam pan turte chu Raj Bhavan hmar lam gate bul aṭangin Tennis Court-ah chhuk a, Khatla kâwn kaltlangin Sikulpuikawnah chhuah tur a ni.

Traffic SP thupek hi vawiin aṭanga hman ṭan tur a ni a, thu leh awm hma chu hman tur a ni ang.