Ruihhlo man sa hâl ral

Aizawla veng panga - Chhinga Veng, Dawrpui, Electric Veng, Saron Veng leh Zarkawt YMA branch intêlkhawm, YMA Joint Duty-te ruihhlo man khawm chu, Inrinni khan Dawrpui School kawtah AMC Ward-IX councillor B Lalawmpuii'n a hâl ral. B Lalawmpuii hian YMA Joint Duty-te hman atan Rs. 1,000 a pe nghal.

Ruihhlo hâl takte hi heroin hawng 6, can 64 leh a chanve, Alprozolam tlêp (strip) ruk leh mum riat, sapzu ûm 12 leh a chanve, rakzu fûn 106 leh a chanve, ganja fûn 11, opium (kani) gram 200 leh beer can 96 a ni a; a hlut zawng chu Rs. 5,00,480 a ni.

YMA Joint Duty hian September 2016-ah duty ṭanin, December 9, 2016 thleng khan ruihhlo an man, an hâl tawh chu Rs. 25,48,600 hû a tling a; ruihhlo kaihhnawihah mi 1,079 an khawm tawh a, home-a mi 134 dahin, Police leh Excise hnenah mi 11 an hlan tawh. Pawl, mimal leh kohhran aṭang-in ṭanpuina cheng nuai hnih chuang an dawng tawh bawk.