MPC-in mobile campaign an nei

MPC party chuan 'Zoram tluchhe mek tundin lehna' tih thupuia hmangin Inrinni khan Aizawlah mobile campaign an nei leh a, Aizawl East-II bial chhung veng hrang hrangah thu an sawi.

MPC thuchhuah chuan, Lal Thanhawla leh Zoramthanga ten kum 30 chhung Mizoram an enkawl tawhnaah Mizoram chu a tlusawp mek zel niin an tarlang a, "Kan ram tlu chhe mek tungding leh turin MPC chuan a damdawi dik tak Brig. T. Sailo hmuh chhuah kan nei. Zoram dam theihna tura ram veitu pawl hrang hrangte nena thawkhoin kan ram hi kan siam ṭha leh dawn a, MPC leh a ṭanrualpuite chungah beiseina thar neia pên chhuak turin mipuite kan sáwm a ni," an ti.

MPC party hian tun hnaia Inrinni apiangin Aizawlah mobile campaign an nei ṭhin a, November 12, 19, 26 leh December 10-ahte an nei tawh a; kum 2017-ah chuan thingtlang lamah chhunzawm an tum a ni.