Aizawl khawpui faina kawnga beihpuithlakna tur hawng

India ram khawpui fai thlanna tur survey, Swachh Survekshan 2017 atan inpuah-chahna, Swachh Aizawl City Plan-2017 chu nimin khan UDPA minister Zodintluanga'n IPR directorate auditorium-ah a hawng. Hemi rual hian Aizawl khawpui chu inthiarna mumal nei lo awm lohna, 'Open Defecation Free (ODF)' ah leh bawlhhlawh a paihna hmunah chauh paihna 'Littering Free Aizawl' a puang nghal.

Zodintluanga chuan, India khawpui faina lama intihsiaknaah Aizawlin dinhmun sang tak a hauh theih nan sorkar a ṭang hle tih sawiin, "Chumi atan chuan Swachh Aizawl City Plan-2017 hi duan a ni. A hlawhtlinna erawh chu a kaihhnawih department-te leh AMC, local council leh mipui ṭawiawmnaah a innghah avangin ṭhahnemngai taka thawhho a pawimawh," a ti a; 'Bawlhhlawh a paihna hmunah chauh paih tur kan ni' tih mipuiin an vawn reng chuan Aizawl chu khawpui fai ber a nih thuai theih tur thu a sawi.

Aizawl khawpui ODF-ah puan theih a nih chuan faina kawnga hmasawnna tilangtu a nih thu sawiin UDPA Minister chuan, "Hun rei tak ngaihtuahna sên tawhna, Littering Free Aizawl chu Aizawl khawpui veng tina dah tur bawlhhlawh paihna báwm 890 sem chhuah a nih hnuah a taka kalpui a ni thei ta hi lawmawm hle," a ti.

Inkhawm hi UDPA secretary Dr C Vanlalramsanga'n a kaihruai a; School Education director K Lalthawmmawia'n Swachh Vidyalayas hnuaia sikul naupang leh zirtirtute'n faina kawnga hma an laknate a tarlang. UDPA director Joseph H Lalramsanga'n Swachh Survekshan atana an inpuahchahna tlangpui leh Swachh Aizawl City Plan 2017 a sawifiah thung.

Littering Free Aizawl hnuaiah hian bawlh-hlawh a paihna hmun baka paihte chu Rs. 5000 thleng pawisa chawi tir theih a ni dawn a ni

Inkhawmaah hian Swachh Aizawl City Plan hmalaknaa faina thu thehdarhtu (ambassador) atan thlanchhuah Swachh-grahis-te hnenah identity card a sem a ni. Swachhgrahi-te hi local council tin aṭangin faina leh thianghlimna lama veng mipuite hrilhhria a hmala turin NULM hnuaia Self-Help Group aṭangin thlanchhuah an ni.

Aizawl hi ODF a puan a nih hnu hian Sorkar laipui atangin rawn endiktu an rawn kal leh anga, hemi rual hian ODF a inpuang tawh Champhai pawh enfiah a ni bawk ang.

India ram khawpui fai thlanna survey, Swachh Survekshan 2017 hi August 6, 2016-ah ram pumah tlangzarh a ni a, nikum khan AMRUT city 73 enfiah zingah Aizawl chu 41-na a ni. Kumin hian khawpui 500 enfiah a ni ang.

Khawpui faina hi ṭhuang thuma endik tur a ni a; chungte chu - Municipal Documentation (AMC report), Direct Observation (Quality Council of India enfiahna) leh Citizen's Feedback (phone/social media leh Swachhata App kaltlanga report) te a ni.