Kum khat chhungin MR 3,926-in an pung

Finance department chhinchhiah danin, Mizoram sorkar hnuaia department hrang hrang-ah tun dinhmunah muster roll (MR) 13,256 an awm a; sorkar kum kal ta 2015-16 ah MR 9,330 awmin, kum khat chhunga MR punna zat chu 3,926 a ni.

Tun dinhmuna MR awm zat 13,256 hi Mizoram sorkarin 'Thla-rau MR' nuaibo tuma hma a lak hnua a awm zat a ni a; sorkar hmalaknain Thlarau MR mi 5,000 vel nuaibo anga ngaih a ni.

Non-Plan hnuaiah PHE department-in MR nei tam berin, mi 2,589 an nei a; GAD-in dawtin, MR 197 an nei. MR 100 aia tam neite chu - Finance department-in mi 100, Home department-in mi 143, FCSCA department-in mi 141, PWD-in mi 196, UDPA-in mi 176 leh Law and Judicial depart-ment-in mi 124-te an ni.

Plan hnuaia hlawh la, Planning & Programme Implementation depart-ment (Research & Deve-lopment Branch)-a sorkar department 41-in an MR neihte hming, an EPIC nena an thehluh tawh zat chu mi 8,848 an ni. Plan hnuaia hlawh la MR nei tam ber chu PHE department niin, MR mi 3,044 an nei a; a dawttu Power & Electricty department-in mi 2,783 an nei. PWD-in MR mi 1,068 an nei a, department dang zawng chu MR mi 100 aia tlem nei an ni hlawm.

Thu dawn danin, Power & Electricity de-part-ment chuan MR hlawh tur hi wages head-ah dah loin, object head hnuai aṭangin an pe a, PHE department pawhin MR eng emaw zat chu object head aṭangin hlawh an la pe. A bak department dang zawng chuan MR-te tan wages head an nei.

MR zat hi kum 2012-13 aṭang khan kum tin a pung a, kum 2012-13 ah MR mi 8,469 awmin, 2013-14 ah mi 9,251, 2014-15 ah mi 9,320 leh 2015-16 ah mi 9,330 leh tun dinhmunah mi 13,256 an awm a ni.