Thla li chhung hlawh lak loh vangin SSA-a thawkte'n badge dum an bel

Mizoram SSA hnuaia thawk mi 4,000 chuangte chuan thla li chhung hlawh an lak tawh loh vanga lungawi loh lantir nan nimin aṭang khan an hnathawhna hmunah badge dum an bel. Hetih lai hian, SSA hotute chuan, hlawh tur Central leh Mizoram sorkarah sum an dil mek thu an sawi.

SSA Employees' Asso-ciation of Mizoram (SEAM) thuchhuah chuan, kum 2013 vel aṭangin hlawh an la mumal thei lo tih tarlangin, "Tunah pawh thla li, August - November, 2016 chhung hlawh kan lak tawh loh avangin hunpui lo thleng tur, Krismas hma ngeiin Mizoram sorkarin hlawh pe se kan duh tih lantir nan sorkar zirna in leh office-a Mizoram SSA contractual employee zawng zawng-te'n December 12, 2016
aṭangin badge dum kan bel vek dawn a ni," a ti.

SSA-a thawkte'n hlawh an lak theih loh chungchangah hian Vanglaini palai zawhna chhangin SSA hotute chuan, hlawh tur chu sorkarah an dil mek a, mahse, an hmuh dawn hnaih leh hnaih loh an hre mai lo tih an sawi.

SSA hotute chuan, kum 2016-17 atan sorkar laipuiin Mizoram SSA-ah sum first instalment a rawn pe tawh a, second instalment dilna pawh nimin khan an thawn thla niin an sawi a; Central-in first instalment a rawn pek tawh Mizoram sorkarin a do letna (state matching share) chu December 6, 2016 khan cheng nuai 160.15 a pe tawh tih an sawi bawk.

Mizoram SSA hotute sawi danin, Central
aṭanga second instalment hmuh la ni lo mah se, Mizoram sorkarin a lo do letna tur state share chu pe lawk mai turin state sorkarah dilna an thlen tawh a ni. SSA hnuaia thawk zawng zawngte tan thla khat hlawh atan cheng nuai 850 vel sên a ngai a, RMSA hnuaia thawkte tan cheng nuai 250 vel a ngai thung.