KHAWTHLIR

Tuialhthei endik

Serchhip District Consumer Association leh Legal Metrology department-te chuan, nimin khan Serchhipa IOC petrol pump an enfiah a, petrol leh diesel-te chu a ṭha tâwk tih an finfiah. "Serchhipa petrol leh diesel-te hi a ṭha hle a, mipuite tan hlauhthawnawm a awm lo tih mipui kan hriattir e," an ti.

ZNP pisa khâr

ZNP chuan nimin khan an party pisa chu kum 2016 chhung atan an khâr a, January 16, 2016-ah an hawng leh ang. Pisa kharna inkhawmah ZNP vice president C Laitanga chuan, “Kan hmaa Krismas lo thleng tur hi Zoram mipui zawng zawngte'n hlim leh lawm taka an hman theih nan ZNP chuan thinlung takin duhsakna kan hlân a ni,” a ti.

Mizoram calendar

Information & Public Relations department-in an siam, Mizoram Calendar 2017 leh Mizoram Diary 2017 (bu lian leh tê) chu vawiin zing dar 10 aṭangin IPR Directorate-ah zawrh ṭan a ni dawn. Calendar hi Rs. 50 man a ni a, Mizoram Diary chu a bu lian Rs. 100 leh a bu tê Rs. 80 man a ni.

Lirthei tlân dan

Traffic SP chuan thuchhuah siamin, Bible House bul kawngpui, MG Road-ah lei a khîk vanga Aizawl chhim lam pan tur lirthei lian rit phurte tlan dan tura ruahmanna siam tawh chu tihdanglam a nih thu a tarlang a, "Treasury Square to Sikulpuikawn via Pi Pangi Pêng, Upper Republic kawngpuiah tlan tur a ni," a ti. Lirthei liante Aizawl khawpui an lo luh theih hun zan dar 7 aṭanga zing dar 8 inkarah Treasury Square to Sikulpuikawn via Pi Pangi peng inkar kawngpui sirah lirthei dah khap a ni.

Adventist hotu zin

Southern Asia Division-a Seventhday Adventist president pastor Ezra Lakra leh secretary pastor M Wilson-te chu nimin khan Aizawlah an rawn thleng a; Aizawlah zan khat riakin, vawiinah Nagaland an pan leh ang. Seventhday Adventist hotute hi Mizorama Adventist chhungkuate rawngbawl dan leh kalphungte zir tura lo kal an ni.