Lirthei thlâk hun bituk sût turin ngen Sorkarin thlâk hun kum bituk sawn a tum?

MNF ṭhalai leh Vigilance department-a hruaitute chuan, nimin khan Transport minister John Rotluangliana a pisaah an hmu a; sumdawnna lirthei (transport vehicle) kum 10 tling tawhte a thara thlak ngei ngei tura ruahmanna a siam chu sût turin an ngen.

MNF-te hi MNYF president K Vanlalvena leh Vigilance changtu general secretary L Thang-mawia ten an ho a, lehkha an thehlut. Sumdawnna lirtheite kum 10 a tlin tawha lirthei thara thlak tura tih tawh chu sût tura ngenin, kum bithliah loin, motor ṭhat dan azira thlâk tura tih ṭha an tih thu an sawi.

John Rotluangliana chuan, vawiinah State Transport Authority an ṭhukhawm dawn a, chutah chuan sumdawnna lirthei thlak hun chungchangah rua-hmanna thar siam tum a nih thu a sawi a, "Kum 10 tih hi kum 14-ah sawn tum a ni a, a thlak nan kum khat chung hun pek a ni ang a, tichuan kum 15 chhung a ni ang," a ti.

Transport Minister chuan, MNF-te chu opposition in nih vang hrim hrima sorkar kalha zawnga che (oppose) lo tur leh, ram leh hnam tana ṭha tur ngaihtuahpui zawk turin a ngen. MNF hruaitute chuan, opposition nih vang hrim hrima thil ti an nih loh thu leh ram leh mipui tana
ṭha tura an hriatah hma an la tih an sawi thung.

State Tranport Authority hotute July 26, 2016-a ṭhukhawm thurel angin, Mizoram sorkar Notification no.F.20016/4/2016-DTE(STA) VOL-IV September 15, 2016-a a chhuahah chuan, mihring phurtu lirtheite service theih hun bituk a ni a, hun bituk pel tawhte chu motor thara thlak ngei ngei tura tih a ni.

Lirthei thlak chungchangah hian MNF vice president R Tlanghmingthanga'n October 29, 2016-ah press conference a nei tawh a, November 2-ah Chief Minister hnenah MNF Vigilance department-in sût leh tura ngenna lehkha a thehlut tawh bawk. MNF-te chuan, a ṭul ang zela hma an lak dawn thu an sawi.

MNF thuchhuah chuan, sor-kar hmalak dan chu lirtheia eizawngtu, rethei leh harsa zawkte eizawnna hrawkhrui sah chahsaknaa an ngaih thu a tarlang a, "Tunah hian motor neitu chhungkua 2,000 chuangte chu replacement an la tih theih loh avangin an mangang em em a ni," an ti.