A ṭul chuan ka in candidate ang - HT Sangliana

Zoram Decentralization Front (ZDF) chuan nimin khan Aizawl Press Club-ah Lok Sabha MP hlui HT Sangliana'n ZDF a zawm thu an puang. HT Sangliana chuan, a
ṭul chuan MLA atana a in candidate hreh loh thu a sawi.

Vanglaini palai zawhna chhangin HT Sang-liana chuan, ZDF chu an thil tum ṭha a tih thu sawiin, "ZDF thil tum hi a tak chang thei ngei se ka duh. A ṭul a nih chuan candidate pawh ka ni ang a, hunin a la rawn hril ang chu," a ti.

ZDF hruaitute chuan an pawl a zawm dawnin, candidate nih pawh a hreh loh thu leh candidate a chang pha lo a nih pawhin a lungawi tur thu a sawi tih an tarlang.

HT Sangliana chuan, Congress party-ah chuan lakluh ni ngei mah se, member a nihna chhin-chhiahna a nei lo niin a sawi a, "Mimalin dikna chanvo kan nei a, kan duh chuan kan báng thei a ni," a ti.

BJP chungchanga zawhna chhangin HT Sangliana chuan, "BJP khan MP candidate atan min sawm a, khatih hunlai khan BJP kulmûkte chu Kristian leh hnam tenaute'n an hlau a ni," a ti a; BJP a zawm ṭumin a Kristian pui tam takin an dem thu a sawi.

HT Sangliana chuan, BJP kalphung ṭha lote dodal tura BJP zawm a nih thu sawiin, "Páwn lam aṭanga dodal ngawt ai chuan a chhung aṭang ngeia dodal ka duh avang-in BJP ka zawm. BJP-a ka awm chhungin Kristian leh minority dangte laka an chêt dan ṭha lote ka dodal a ni," a ti.

BJP chêt dan ngau ngau chu a sawisel loh thu sawiin HT Sangliana chuan, "BJP-te thlawptu RSS zinga tlemtê an sual a ni. A sualte hi tlemtê chauh an ni," a ti a; BJP hrim hrim chuan hnam tenau dodal záwnga chêt an tum lo niin a sawi.

ZDF hotute chuan, Mizorama rorel a nih dan chu mi tlemte thuneihna leh hausakna, mipui tak zawkte retheihna siamtu niin an sawi a, "He rorel dan kalphung him lo tak hi hmang zui tawh loin, state rorelna hnuaia rorelna chawng hnih, district leh village-a a awm hi kan duh dan a ni," an ti.