Police lak thar training zo mi 64 thlah

Police Training School (PTS)-a police lak thar training zo mi 64-te pualin nimin khan Passing Out Parade neih a ni a, Home minister R Lalzirliana'n a hmanpui. Training chhuakte hi police constable tura lak batch 66-na an ni.

Home Minister chuan, police pawimawhna hrang hrang sawiin, "Kan ramah police tel loin kan awm thei tawh lo a, an tel loin state a him lo a, an inpek dan azirin sorkar a mawiin a mawi lo thei a, mipui an himin an him lo thei a ni," a ti a; police training chhuak tharte chu theih-tawp chhuah a, tih tak takna leh rinawmna nen hna thawk turin a chah.

R Lalzirliana chuan, police tuna training chhuak thar zinga mi 60-te chu pianphungah pawh ft. 6 chuang chin thlan chhuahte an ni tih sawiin, "In lakah beiseina kan nei sang hle a ni," a ti.

DGP Thianghlima pawhin thu sawiin, police hnaah inthununna pawi-mawhna a sang hle hle tih a sawi a; thuawihna nun nen an hna thawk turin a chah.

Training chhuakte hi mi 64 an nia, Aizawl city police tur bika lak ft. 6 chin lak mi 60 leh CID (SB) lam mi pahnih, MPRO leh IR-a mi pakhat ve vete an ni a; a tira training mi 65 zinga pakhat chu hrisel lohna vangin training a zo thei lo. Training chhuakte hian PTS principal Lalbiakthanga kaihhruaiin rinawmna thutiam an la a ni.

Training laia kawng hrang hranga ti ṭhate tan trophy/medal pakua siam a ni a; a pumpuia ti ṭha ber lawmman, Governor of Mizoram Running Trophy and Gold Medal
for All Round Best chu Zoramthanga hnenah hlan a ni.