MSU-in kawngpui siamtute an kâwm

Mizo Students’ Union (MSU) gen.hqrs. hruaitute chuan nimin khan Mizorama kawngpui siam hna thawktu company pariat hotute an titipui a; kawngpui siam hna thawh dan leh company-te'n harsatna an thawhte an sawiho.

MSU president RB Lalmalsawma chuan, MSU thil tih zawng zawng zinga 80% chu zirlaite tan an hmang dawn tih sawiin, "Mizorama inkalpawhna hian zirna a nghawng a, ram mipui a nghawng a, sorkar a nghawng. Working season a inṭan chiah avangin hna hmasaah kan nei dawn a ni," a ti.

Kawng siamtu company-te'n Mizoram working season hre sain tender an chháng tih sawiin, MSU President chuan, "Tun working season chhung hian labour 100 in chhawr ṭhinnaah 200 in chhawr ang a, JCB panga in hmanna ṭhinah 10 in hmang mai tur a ni. Hei hi company lian chuan inti thei," a ti a; company-te chu Mizoram tan thawkho turin a sáwm.

Inkawmhonaah hian kawng siamtu company aiawhte chuan harsatna an tawh hrang hrang an sawi a; company-te dinhmun leh hnathawh dante en thlithlai reng chungin January 2017 tawp lamah inhmuhkhawm leh ni se, tiin thu an dah.

MSU thuchhuah chuan, hna thawk ṭha company-te a welcome reng tih a tarlang a; revise estimate beiseia rùn dâla hna thawh chíng, sumdawn nana Mizoram kawng rawn hmang ringawt leh engineer ṭhenkhat, company thurualpui chíngte chu dimna tel loin an chungah MSU-in hma a la zel dawn tih an sawi bawk.