Mizoram Solar Power Policy zirho

P&E dept., JERC (M&M), Eternity Partner leh Zoram Energy Development Agency (ZEDA) ṭangkawp chuan, nimin khan Aijal Club-ah The Mizoram Solar Power Policy 2016 zirhona an buatsaih.

Sawihona hun hi ZEDA director Lalrinmawia'n kaihruaiin, P&E secretary Lalhmachhuana, Aizawl DC Kannan Gopinathan, Siaha DC Harleen Kaur bakah PWD, LAD, Mizoram Police, Minor Irrigation, Higher & Technical, Accounts & Treasuries, Art & Culture, SIPMIU, Taxation, Tourism, Fisheries, Geology & Mineral Resources aiawhte an tel.

Sawihonaa tarlan a nih danin, The Mizoram Solar Power Policy 2016 chu duan zawh tawh niin, cabinet ah pass tura ruahman mek a ni. He policy hian ni zung chakna nasa zawka hman ṭangkai theih dan tur a ruahman a, mimal, sorkar leh zirna inte tan hamṭhatna hrang hrang pawh rawn chhawp chhuak tura tih a ni.

Ministry of New and Renewable Energy (MNRE)- in a tarlan dan chuan Mizoram hian ni zung atanga kawlphetha hmanga eng a siam chhuah theih zat chu Mw 9090 a ni a, tun dinhhmunah Mizoram hian Mw 4.2 vel a siam chhuak a, a tam zawk hi mimal thar chhuah niin, power line-ah thlunzawm (grid-connected) loh vek a la ni.

Sorkar laipui chuan Renewable Energy Purchase Obligation (RPO) siamin, state tinte renewable energy hman tur zat a bituksak a, Mizoram chuan kumin (2016) chhunga eng kan hman zawng zawng aṭanga 2% hi ni zung chakna (Solar Energy) aṭanga kan hman a ngai a ni.

Solar energy hmanga power kan thar chhuahte hi grid-a kan chhun luh loh avangin, sorkar laipuiin RPO min bituksak tihhniam nan hian hman theih a ni loa, chuvangin RPO phuhruk nan Renewable Energy Certificate (REC) lei a ngai ṭhin a ni.

Mizoram sorkar chuan REC kan lei thin tihtlem emaw tihbo emaw na tur leh mipuite hamṭhatna tura sorkar laipui-in a duan, subsidy leh scheme hrang hrangte thlirin he policy hi a duang a ni. Mipuite‘n mahnia Ni zung chakna hmanga kawlphetha, kan in chung leh a chheh vel aṭanga kan siam chhuahte sorkara kan hralh theih dan turte pawh he policy-ah hian duan tel a ni.