Home Minister-in Sainik School a tlawh; Mizoram quota/seat luah khah a ni ngai lo

3rd June, 2026

Home minister K Sapdanga chuan nimin khan Sainik School, Chhingchhip a tlawh a, Unit Run CSD Canteen thar a hawng. Sainik School hotute chuan, tualchhung (Mizoram) tana seat zuah (reserve)-te chu Mizoram mite'n an luah khah zawh ngai loh thu Minister an lo hrilh.

Home Minister hi Sainik School hotu te, zirlaite leh ex-servicemen-te nen an inkâwm a; Sainik School hotute chuan, an sikulah hian Mizoram tan seat awm zawng zawng aṭanga 65% hauh (reserve) a ni a, mahse, Mizorama mite'n an luah khah zawh loh avangin state dang mite seat pek ṭhin a nih thu an sawi.

K Sapdanga chuan, Sainik School chu ram leh hnam tana mi rintlak, rinawm leh inthununna ṭha nei tura inzirtirna hmun pawimawh a nih thu sawiin, ram leh hnam tana mi ṭangkai tak nih tum turin zirlaite a fuih a; ram tana mi ṭangkai chher chhuak zel turin thawk-tute duhsakna a hlan.

Zirlai nu leh pa, inpekna thûk tak neia an fate Sainik School-a kaltirte fakawm a tih thu sawiin Sapdanga chuan, "Hmun hla tak aṭanga boarding school-a an fate hma lam hun ngaihtuaha an dah hi an fakawm ka ti tak zet a, zirlai nu leh pate zawng zawng in fate tiphûr a, thlawp tlat turin ka ngen a ni," a ti.

Home Minister chuan, zirlaite chu nakina Mizoram la enkawltu tur an nih thu a sawi a; armed force an zawm emaw, civil service an zawm emaw, hna dang pawh thawk se, Sainik School aṭanga an zir chhuah inthununna, hawihhâwmna, taimakna leh mi dang tana inpekna te chu an dam chhunga vawng reng turin a chah a ni.

K Sapdanga chuan, Mizoramin ṭhalai taksa chak ṭha, rilru harhvâng leh ram tana inpe a mamawh tih sawiin, "Sainik School-a zir mekte hian kan ram hi min la chawimawi ngei ang tih ka ring. Khawtlang tana thil ṭha ti tur leh khua leh tui rinawm leh hruaitu lo ni zel turte chher chhuahna kawngah theihtawp chhuah tlang zel turin i intiam thar ang u," a ti.

Home Minister hi MLA Lt Col. Clement Lalhmingthanga, Home secretary Vanlalmawia leh joint secretary PC Lalduhthlanga, 14th Assam Rifles hotute leh sorkar official dangte'n an ṭawiawm a ni.

Sainik School, Chhingchhip hi Sainik School naupang ber a nih rualin, zirna pangngai nena kal kawp Sainik School hmasa ber a ni thung a; session khatah fee Rs 2,00,000 a ni a, 100% re-imburse (hmuh let) theih a ni.