Union MoS-in Mizoram a rawn tlawh
Sorkarlaipuia Information & Broadcasting leh Parliamentary Affairs enkawltu minister of state Dr L Murugan chuan zan khat riak turin nimin khan Aizawl a rawn thleng a; Information & Communication Technology minister Dr Vanlalthlana leh Information & Public Relations minister B Lalchhanzova ten Lengpui Airport-ah an lo hmuak.
Dr L Murugan, Dr Vanlalthlana leh B Lalchhanzova te hi Lengpui Airport-ah an ṭhukhawm nghal a; IPR minister B Lalchhanzova chuan, Mizorama chanchinbu/media, film industry leh digital infrastructure tihmasawnna tura rawtna hrang hrang a thlen. Union Minister chuan, a hnena mamawh thlente chu tihhlawhtlin ngei a tum thu a sawi.
MoS Dr L Murugan hian nimin khan Kolasib a pan nghal a, district bawrhsap leh sorkar officer dangtte nen review meeting an nei. Vawiin hian Kolasib leh a chhehvela hna thawh mekte a tlawh ang.
IPR MINISTER-IN NGENNA A THLENTE
☑ AVGC Content Creator Labs: Mizorama sikul 200 leh college 20-ah animation, visual effect, gaming, leh Comics (AVGC) content creator lab din a nih theih nan allocation siamsak turin.
☑ Film siamtute chawikanna: National Film Development Corporation (NFDC) leh Film and Television Institute of India (FTII) anga institution hmingthangte kaltlangin Mizo zinga film siamtute tana training & skill development programme buatsaih turin.
☑ Film Festival: Kumin kum tira a vawi khatna atana buatsaih Lemchan Film Festival chu chhunzawm zel a nih theihna tura hma laksak tur a, Festival chu ni 5 al awh a nih theih nan hma la turin.
☑ Cinema Theatre Infrastructure: Hmarchhak state-te tan bik cinema theatre infrastructure cheiṭhat leh din thar nan scheme hrang siamsak turin.
☑ Media Project: IB Ministry hnenah hmarchhak state-te tana 10% Gross Budgetary Support (GBS) dah hran aṭanga Mizoram sorkar hnuaia project thar leh hmasawnna tura ruahman hna hrang hrangah sum pe turin.
☑ Film Festival Exposure: Mizo siamtute'n ram chhung leh khawvel huap film festival lian thamah te an tel ve theih nana institutional support pek chhunzawm zel turin.