MizoTaxi duh loh thu Minister-ah thlen

Mizoram Taxi Asso-ciation (MTA), Aizawl Two Wheeler Taxi Association (ATTA) Aizawl District Auto Rickshaw Owner's Association (ADAROA) office bearer-te chuan MizoTaxi mobile appli-cation hman an duh loh chungchangah nimin khan Transport minister Vanlalhlana chu a pisaah kâwm a; Minister chuan department hotute nen sawiho a lo tiam.

Pawl pathum hruaitute chuan Transport Minister hnena lehkha an thehlut a; State Transport Authority (STA) Secretary-in MizoTaxi mobile app hmang vek tura office order a tihchhuah chuan a barakhaih hle tih tarlangin, "He application chungchanga inrâwnna leh sawihona mumal awm loa hmang vek tura thupek (order) a rawn chhuak hi kan hrethiam loin, STA-in he application min hmantir a tum dan hi kan pawm thei lo a, order hi min cancel sak turin kan ngen a che," an ti.

MizoTaxi hman an duh lohna tarlangin pawl pathumte chuan, "Application man chawi ngai loa hman theih a awm laia hman man kum tin chawi a ngai tur hi ṭha kan ti lo a, application hman man chhiah mipuite'n an chawi ve a ngai tur hi ṭha kan ti lo," an ti a; tunlaia thil man sang zelah thil dang man tihniam tura hmalakna awm si loa taxi leh auto-rickshaw-a eizawngte chunga hmalak a ni chu an hriatthiam loh thu an tarlang.

MTA, ATTA leh ASAROA hruaitute chuan, MizoTaxi hmang tura pawimawh ber internet network chu Mizoramah a la ṭhat tâwk loh thu leh chu chuan lirtheia eizawng leh mipui tan harsatna a thlen theih thu an tarlang bawk.

Pawl pathumte hian thuleh a awm hma leh, sawihona a awm hma chuan MizoTaxi app download lo tur leh inziak lut lo turin an member-te an hriattir a ni.