Aizawlah CM Special Package sem a ni

Aizawl Bawrhsap pisa chuan nimin khan Vanapa Hall-ah Bána Kaih (Handholding) hnuaia Chief Minister's Special Package thawh hnihna (phase-II) dawngtu progress partner 277-te pualin orientation training an buatsaih a, ṭanpuina sem nghal a ni.

Orientation training-ah hian chawhmaah inzirtirna hun hman niin, chawhnuah CM Special Package ṭanpuina sem a ni a; Aizawl bawrhsap Lalhriatpuia'n kaihhruaiin, adviser to chief minister (Handholding) Dr KC Lalmalsawmzauva, Mizoram State Policy Coordination Committee (MSPCC) vice chairman ni bawkin a hmanpui.

Sorkar thuchhuah tarlan danin, Mizoram pumah Bána Kaih phase-II hnuaiah CM Special Package dawng turin Apex Body-in mi 1,129 a pawm tawh a, chu'ng mite tana sum ruahman chu Rs 5,62,36,997 (nuai 562.36) a ni. Phase-II hnuaia progress partner mi 439 hnenah loan Rs 40,51,85,565 (nuai 4,051.85) pek chhuah a ni tawh.

Nimina Vanapa Hall-a hun hmanah hian mi 277 hnenah ṭanpuina sum pek a ni a, instalment-a pe loin, direct benefit transfer hmangin progress partner-te bank account-ah pek tlak nghal a ni. Ṭanpuina sum pek hi Rs 50,000 aia tam lo a ni.

Dr KC Lalmalsawmzauva chuan, Handholding scheme chu scheme ṭha tak a nih thu sawiin, "India ram state hrang hrangte'n an mi leh sate eizawnna leh chawikanna tur an duan zingah Mizoram Handholding scheme hi a ṭha ber a nih loh pawhin, a aia ṭha kan hre mai lo. Sorkar guarantor-a a ṭan bakah, a pung zawng zawng a rulhpui leh vek a ni," a ti a; hriat theih chinah state pasarih velin an mi leh sate tan sorkar guarantor-ah a ṭang a, Mizoram anga a pung zawng zawng rulhsak chu Telengana chiah a nih thu a sawi.

CM Special Package chu a thlâwna sum sem ringawt a ni lo tih sawiin KC Lalmalsawmzauva chuan, "Project based a ni. Project based kan tih chhan pawh, ruahmanna felfai tak nen hma in lak kan duhpui vang che u a ni. Uluk takin implementing department leh district monitoring team ten an ûm zui dawn che u a, ti tak tak lo kan awm a nih chuan in mualpho hle dawn," a ti.

Adviser to CM chuan, sawhthing support price an pe chhuak mek zel tih sawiin, tuna la hmu mai lote chu DAMC lamah zawt turin a chah a, "DAMB lamin an rawn tihfel chuan pek chhuah zel kan tum," a ti a; dawhthei taka nghak turin a chah.

CM SPECIAL PACKAGE SEM DAN

(Aizawl Disttrict - June 2, 2026)

SN Department Pek zat

1 Commerce & Industries 220

2 Agriculture 5

3 AH&Vety 11

4 LRSWC Department 5

5 UDPA Department 5

6 Social Welfare 27

7 Cooperation Department 2

8 Science & Technology 2

TOTAL 277