Jail-a tángte rilru leh taksa lama an hriselna atan hmalak zel a ni dawn - HM

Home minister K Sapdanga chuan nimin khan Serchhip District Jail a tlawh a, jail thawm ṭhat leh tihchangtlun hna thawh mekte a en. Minister chuan, jail-a tángte rilru leh taksa lama an hriselna atan sorkarin hma a lak zel dawn thu a sawi.

K Sapdanga chuan, hna hrang hrang zingah mihring enkawl, a bikin sual kawnga tlu tawh jail tángte enkawl chu hna hautak leh pawimawh a nih thu a sawi a, "Jail hi mihring ṭha lote rilru leh taksa siamṭhatna hmun a nih avangin, a hmingah pawh 'Prison and Correctional Services' tia thlak a ni tawh," a ti.

Jail tángte chu rilru lamah chauh ni lo, taksa lamah pawh an hrisel a ṭul tih sawiin Home Minister chuan, jail tángte an hrisel zawk theih nan medical staff-te'n regular taka an tlawh ṭhinna turin hmalak zel a nih tur thu a sawi.

Minister ṭawiawmtu Home secretary Vanlalmawia chuan, jail tángte hriselna ngaih pawimawh a ṭul thu leh medical duty ngaih pawimawh a ṭul thu a sawi a; jail vengtute tan, mi tángte enkawl dan leh thil hrang hrangahte training ngaih pawimawh a ṭul thu a sawi bawk.

Home Minister hian jail building sak ṭhat hna thawh mekte a enfiah a; hna thawktu PWD leh contractor-te chu theihtawp chhuah zui zel turin a chah. Serchhip District Jail hi SASCI 2024-2025 hnuaiah cheng vbc 3.7 hmangin tihchangtluna sak ṭhat mek a ni.

Administrative building thawm ṭhat leh zauh te, multipurpose hall leh bahrik (barrack) thar sak te, mi tang ṭhenkhatte khung hranna tur segregation cell sak te, skill training-na tur vocational hall sak hna te, guard duty post leh MI Room zauh hna te, Male Ward-2 leh chapel sak ṭhat hna te, staff quarters leh superintendent quarters sak hnate thawh a ni.