Lungleiah MIZOFED building hawng

Lunglei Electric Venga Mizoram State Cooperative Marketing & Consumers' Federation (MIZOFED) building thar chu nimin khan bialtu MLA Lalrinpuii, minister-in a hawng.

Lalrinpuii chuan, MIZOFED in thar hawn a ni ta chu Lunglei mipui tan hmasawnna a nih thu sawiin, "Mizote hi thil tihho nuam ti chi, feh kawng, tui chawina leh thing phurhna thlenga ṭhiante nena inláwma thil ti ṭhin kan nih a, kan mizia leh cooperative society hi a inhmeh hle a, Mizoramah zung a kaih thûk hle a ni," a ti.

Mizoramah kum 1981 aṭangin state pum huap cooperative society hlawhtling tak MIZOFED din a nih thu sawiin Minister chuan, "Tun thlenga hlawhtling taka kalpui a ni. Mipui mimir chuan MIZOFED hi a man tláwma thil zawrhna leh a hlawma thil lak tlàwm theihna tia an hriat ṭhin a ni," a ti a; MIZOFED-ah thil lem leh quality ṭha lo zawrh a nih ngai loh thu a sawi.

Lungleia MIZOFED in sak nan hian cheng nuai 80 ruahman niin, MIZOFED sum thawh chhuah hmanga sak a ni a; Cascade Architecture and Engineering, Zotlang, Aizawl (Northpoint Consul-tancy)-in March 1, 2025 khan sa ṭanin, thla 12 leh ni 2 chhungin an sa zo a ni.