Hnahthialah CM Special Package sem

South Tuipui bialtu MLA Jeje Lalpekhlua chuan nimin khan Hnahthial DC conference hall-ah mi 24 hnenah Bána Kaih hnuaia Chief Minister's Special Package phase-II ṭanpuina a sem.

Ṭanpuina hi mi 24 hnenah pek niin, pawisa pek tur zat Rs 50,000 pek tlak nghal a ni a; Commerce & Industries departmen hnuaiah mi 14, Fisheries departmen hnuaiah mi pariat, Agriculture & Farmers Welfare leh Urban Development & Poverty Alleviation department hnuaiah mi pakhat ve ve an ni.

Jeje Lalpekhlua chuan, sorkar aṭanga hamṭhatna awmte a dawngtute'n a nihna tur ang taka an hmang lo ṭhin chu pawi a tih thu a sawi a; CM Special Package chu a hmaa dawng tawhte'n an hman ngaihven chunga a ṭha thei ang bera hmang turin ṭanpuina dawngtute a chah.

Inkhawm kaihruaitu Hnahthial additional DC Zothanmawia Khiangte pawhin thu sawiin, "CM Special Package hi tum bik neia thilthlawn pek a nih angin, a dawngtute'n a hlawhtlinna hmu thei tura ṭan an lak a ṭul," a ti a; ṭanpuina petu tihmingchhetu ni lo turin sum dawngtute a chah a ni.

South Tuipui bialtu MLA Jeje Lalpek-hlua hian nimin khan Hnahthial khaw chhunga hnathawh mekte a enfiah bawk.