Gas man bithliah thar a ni; Domestic bûr man a pung lo

Indian Oil Corpora-tion-in eirawngbawlna gas (LPG) man a tihchhuah thar angin Food, Civil Supplies & Consumer Affairs (FCSCA) department chuan Mizorama gas man a tichhuak a; domestic cylinder man tihdanglam a ni lo a, gas bûr dang man man tihsàn a ni. Gas man thar hi June 1, 2026 aṭangin hman ṭan a ni tawh.

FCSCA tarlan danin, chhungkuaa eirawngbawlna atana hman tlánglâwn domestic cylinder (kg 14.2) man tihdanglam a ni lo a; Vairengteah bûr khat Rs 1,056 niin, Mizoram hmun dang zawngah Rs 1,065 man a ni. Domestic cylinder hi March 7, 2026-a sorkar laipuiin West Asia buaina vanga Rs 1,005 (Vairengteah Rs 996) aṭanga Rs 1,065 (Vairengteah Rs 1,056)-a a tihsan hnuah tihdanglam a la ni leh lo.

Vairengte tih loh hmun dang zawngah commercial cylinder (kg. 19) man Rs 3,598.50 niin, May thlaa a man Rs 3,544.50 aiin Rs 54-in a pung. XtraTej (kg. 19) chu Rs 3,621 niin, May thlaa a man Rs 3,567 aiin Rs 54-in a sang zawk a; composite (kg. 10) man chu Rs 766.50 niin, April thlaa a man Rs 766 aiin pawisa 50-in a sang bawk.

Mizoram luhka Vairengteah chuan commercial cylinder man Rs 3,584, XtraTeJ man Rs 3606.50 leh composite man Rs 756.50 a ni.