World Bicycle Day hman a ni

Nimin zing khan Mizoram hmun hrang hrangah World Bicycle Day hman a ni. Aizawlah chuan Mizoram Cycling Association (MiCA), Mizoram State Sports Council, Sports Authority of India, MYBHARAT leh Excise and Narcotics department ṭanghoin Cycle Rally an buatsaih.

Cycle Rally puala inkhawm tawi Vanapa Hall kawta buatsaihah khuallian IGP (Crime) Seju P Kuruvilla chuan, hriselna leh taksa chak ṭha (fitness) chu ngaih pawlh awl tak, hrang daih si a nih thu a sawi a, hriselna khawih pawi thei thil - zûk leh hmuam leh ruih theih thil chi hrang hrang laka fihlim turin ṭhalaite a chah.

Kumin World Bicycle Day Rally-a telte hi Fit India hmalaknain mumal taka chhinchhiah vek an ni a; nimin zinga Rally-a telte leh kawngpuia veivâk mipui him nan Aizawl Traffic Police chuan ruahmanna an siam a ni.

Lunglei District Cycling Association chuan nimin zing khan Lungleiah cycle rally an buatsaih a, cyclist eng emaw zat an tel. Thenzawl Cycling Association pawhin Thenzawlah cycle rally an buatsaih bawk.