Kau Tlabung leh Tuipangluiah Court thutlukna la khing lêt lo

Mizoram sorkar chuan Kau Tlabung Mini Hydel Project leh Tuipanglui Mini Hydel Project (MHP) chungchanga Aizawl District & Session Judge thutlukna Gauhati High Court-ah khin lêt tum mah se, nimin thleng khan a la khing lêt lo.

Vanglaini palai zawhna chhangin Gauhati High Court-a sorkar ukilte chuan, Anti Corrup-tion Bureau (ACB) aṭangin document an la hmuh loh thu an sawi a, "Gauhati High Court-a kal tur chuan tih mai mai theih a ni lo a, document felfai tak neih a ngai. Keini chuan document mamawhte kan hmuh hunah kan zir chiang ang a, chumi hnuah Advocate General remtihna kan la ang. AG-in rem a tih chuan Court-ah hian kan kal thei chauh dawn a ni," an ti.

Kau-Tlabung MHP leh Tuipanglui MHP thubuaiah hian Special Judge (Prevention of Corruption Act) Lucy Lalrinthari chuan October 27, 2016 khan thutlukna a puang a, eiruknaa inhnamhnawiha puhte thiam a chantir. Thubuai hi October 25-27, 2016 chhung khan Special Court chuan a ngaihtuah a, thubuai chhuitute'n finfiahna an neih loh thu a tarlang.

Thu dawn danin, Aizawl District & Session Court-a sorkar ukilte chuan Special Judge thutlukna chu a dik tâwk loa an hriat avangin, dik tâwk loh an tih hrang hrangte tarlangin, Gauhati High Court-a khing lêt turin sorkarah rawtna an thlen. Sorkar chuan, sorkar ukilte rawtna chu a zir chian leh a ngaihtuah hnuah November 21, 2016 khan High Court-a khing let tura rawtna a pawm a ni.

Gauhati High Court-a zualko an duh chhan Vanglaini palai zawhna chhangin, District Court-a sorkar ukil RC Thanga chuan, "Special Judge thutlukna hi a dik tâwk lo kan ti lo thei lo," a ti.

RC Thanga sawi danin, thu-buai ngaihtuah a nih rêng rêngin, Court-in thubuai ngaihtuah tlak a nih leh nih loha thutlukna (charge frame) a nih hmain, police-te'n chargesheet an thehluh chu zir chian a, ngaihtuah zui zel tlak a nih leh nih lohah thutlukna siam ṭhin a ni. Thubuai neite ukil (defence counsel) chuan charge frame hmaa thubuai tihtawp tumin theihtawp an chhuah ṭhin thung.

Charge frame a nih hma chuan document pawimawhte zir chian a nih ngai loh bakah, thuhretu pawh koh an ni ngai lo. Kau-Tlabung MHP leh Tuipanglui MHP thubuaiah hi chuan charge frame a nih hmain defence counsel-te document thehluh leh thuhretute thusawi hmangin thubuai tihtawp a ni. Sorkar ukil lamin defence counsel-te document an hnial hman loh bakah, thuhretu pawh an ko ve hman lo.