Dr Thangtea thubuai chhui chian cho

MNF chuan thu­chhuah siamin, an party vice president Dr R Lal­thangliana chu Court-a thubuai neihtir ngei tumin Congress party-in an ûmzui tih an tarlang a, "Dr Thangtea thubuai chhui chiantir hi kan cho," an ti.

MNF-in Dr R Lalthang­liana thubuai neih chhan an tarlan danin, Cong­ress sorkar term hmasa kum 2012 khan School Edu­cation minister Lalsawta leh School Education minister hlui Dr R Lalthangliana te chu Assembly House-ah thu inchuh neiin, SSA sum, school uniform leina tur kum 2010-2011-a mi cheng nuai 743.16 lapse chungchangah nasa takin an inhnial a ni.

Khatih laia Delhi MZP Vice President chuan Ministry of Human Resource Development-a Depart­ment of School Education & Literacy-ah RTI Act hmangin Mizoram SSA sum a lapse leh lapse loh a zawt a; chhannaah chuan uniform leina tur chu a hmanna tur kuma hman a nih loh chuan, a kum leh atan hman tura dah (spill over) theih a nih tawh loh thu tarlan a ni.

Rajya Sabha MP zawhna pawh Department of School Education & Literacy chuan SSA sum pek tawh chu hman loh a nih chuan, a kum leh atan hman zui tura dah theih a nih loh thuin a chhang.

MNF chuan, SSA sum lapse chungchangah Cong­ress party-in mipui rilru hruai pên an tum nia sawiin, 'Dr Thangtea inah chaw ei khawm' tih hmangin dâwtin press release an siam niin an sawi a, "An press release-a hming ziaktu, khatih lai Congress Media Secretary chuan an thuchhuah hi a dik loh thu a puang ta a ni," an ti a; chumi hnuah Congress party Media department-a member pakhat chuan Dr R Lalthangliana chhui turin ACB-ah FIR a thehluh tâk thu an sawi.

MNF chuan, kum li hnua charge­sheet peih thu Congress-in chhuang takin an sawi tih sawiin, "Hei hi vai ramah pawh an tih duh zen zen loh, politics hri chhia a ni Congress party-in an puhna kawngah MNF Vice President hi a fihlim tâwk tih kan sawi duh a, Court hmaa ding tur leh a thubuai chinfel hun tur kan nghakhlel tak meuh meuh a ni," an ti.