ODF-ah Lunglei khawpui puan a ni ta

Lunglei khawpui chu nimin khan inthiarna mumal nei lo awm lohna, Open Defecation Free (ODF)-ah puan a ni. ODF puanna inkhawm hi nimin khan Lunglei DC pisaah neih a ni.

Lunglei DC leh Swachh Bharat (Urban) for Lunglei District chair-person Lalzarmawii chuan, pawna inthiar awm lohna khawpuia Lunglei puan a ni ta chu lawmawm a tih thu leh Lunglei district tan ni chhinchhiah tlak a nih thu a sawi a, "Sorkar laipui duh dan angin, Mizo-ram sorkarin Mizoram chu Open Defecation Free State a nih ngei theih nan chak takin hma a la mek a, ODF puan a nih tawh chuan páwna inthiarte chu hrem theih an ni," a ti.

Lalzarmawii chuan, sorkar laipuiin India ram chu khawvela ram fai, thianghlim leh hrisel a nih theih nan Swachh Bharat Mission hmangin thingtlang leh khawpuiah faina beihpui a thlak tih a sawi a; kum 2019-ah chuan India ram chu khawvela ram fai leh thianghlim zinga tel phak ngei turin chak takin beihpui thlak a nih thu a sawi bawk.

Lungleia UDPA officer Andrew Lalhruaia chuan, ODF-a Lunglei puan a nih theih nana hma an lak dante leh hmachhawp an neihte a sawifiah.

Andrew Lalhruaia tarlan danin, tun dinhmunah Lungleia UDPA department hnuaiah mimal inthiarna, ek-in 50 sak a ni tawh a, ek-in dang 100 sa tura hmalak mek a ni. Vantlang zun-in 20 leh vantlang ek-in 10 sak a ni tawh bawk.

Lunglei khawpui ODF-a puang tur hian UDPA department kaihhruaina hnuaiah School Education department, Lunglei khawpuia V/C te, YMA-te leh self help group hrang hrangte thawkhoin hma an la a; ODF-a hming ziak tawh zingah hian Lunglei khawpui chhunga V/C 24, zirna-in 87-a zirlai 8,000 leh self help group 58 an tel a ni.