2017-ah chak zawkin hma kan la dawn - MPC President

MPC president Lal-hmangaiha Sailo chuan, kum 2016 chhunga MPC party-in ram leh mipui tana hmalakna tur thil tam tak an tih tâwk lohah mipui ngaihdam a dil a, kum 2017-ah chuan chak zawka hma an lak dawn thu a sawi.

Nimina MPC party pisa kharna inkhawmah thu sawiin Lalhmangaiha Sailo chuan, kumtluana an party kaihruaitu Pathian chungah te, an party hruai-tute thawhrimna vang leh mipuite chungah lawm-thu a sawi a ni.

MPC President chuan, Congress kaihhruai sorkar hnathawh dan kan thlirin, an hnathawh 10% bak chu ram leh mipui hlimna tur leh hmasawnna tur a awm mang lo nia sawiin, "Duhthu a sâm mawh khawp mai. NLUP/ NEDP-in a khawih chin der der bak chu sector dang zawng zawng ṭhuan-awpin an khawsa mai mai a ni deuh ber. Tun Assembly session aṭang pawh khan chhàn theih loh an nei fur a, sorkarna buarchuar leh mám zãn lo a hmuh theih," a ti.

Zoram politic boruak thlak danglam duhna rilru a lian chho mek nia sawi-in, Lalhmangaiha chuan, "A lehpek atan chuan non-Congress, non-MNF hi mipuiin an duh tawh. Chuvang chuan mipuiin a thlaktu tur an zawng a ni. MPC leh pawl leh group hrang hrang, Zoram siamṭhat duhtu-te'n mipui duh leh beisei hlen chhuahsak tumin theihtawpin hma kan la
ṭan a, mipuiin min phûrpui viauin a lang," a ti a; kum 2018-a Assembly inthlan-ah mipuite sorkar siam ngei turin mipuite thawh-hopuiah a sáwm a ni.

MPC party hian an pisa chu kumin chhung atan an khâr a, kum 2017-ah an hawng leh ang.