Good Governance Day hriatthiam harsa ti

Central YMA chuan thuchhuah siamin, sorkar laipuiin Krismas ni tak, December 25-a Good Governance Day hman tur a ti chu hriatthiam harsa an tih thu an tarlang a, "Kristian-te ni pawimawh tihbawrhbân a nih loh nan CYMA chuan a tàwp thlengin hma a la dawn a, Mizo mipuite thlaphâng lo turin kan duh," an ti.

CYMA chuan, Mizoram chu Kristian ram tia chhâl ngam a nih thu sawiin, kum 2011 chhiarpui ang chuan Mizoram mipui zinga 86.97% chu Kristian an nih thu an sawi a; December 25 chu Kristiante ni pawimawh ber a nih avangin chhung tinte'n kim taka hman tumin an inbuatsaih ṭhin a, Kohhran programme pawimawh tak duan a ni ṭhin tih an tarlang.

Sorkar laipuiin December 25-a Good Governance Day hman tur a ti chu hriatthiam harsa an tih thu sawiin, CYMA chuan, "Kan hmang ve a nih chuan sorkar officer leh staff tam tak Krismas ní-ah office kal a ngaih phah dawn. He thil hi kan duh loin, Mizo mipuite hmuhsitna leh zahlohna nasa takah kan ngai a, Kristian rinna tihdal tumna hmanrua pakhatah kan ngai," an ti a; Kristiante ni pawimawh tihbawrhbân a nih loh nan CYMA-in hma a lak dawn thu an puang.

Central YMA tarlan danin, Kristian 30.26% awmna Arunachal Pradesh-ah chuan Arunachal Kristian Forum (ACF)-te'n an Chief Minister hnenah Good Governance Day, December 25-ah hman a nih loh nan memorandum an thehlut a; chu chu Chief Minister chuan zahsakin, December 25-ah Good Governance Day hman a nih loh tur thu a tiam a ni. Meghalaya-ah pawh Good Governance Day chu December 23-a hman turin an sawn hma bawk.

Mizoramah pawh Good Governance Day chu December 25-a hmang lo a, sawn hma emaw, sawn tlai emaw a nih theih nan CYMA chuan chak taka hma la turin Mizoram sorkar an ngen a; a tul a nih chuan Prime Minister hnenah Memorandum thehluh an tum thu an tarlang a ni.

MZP pawhin thuchhuah siamin, Kristiante ni pawimawh ber Krismas ní-a Good Governance Day hman tura tih a ni chu ṭha lo an tih thu an tarlang a, "Kum 2014 khan Prime Minister hnenah he ruahmanna hi sût tur leh Kristiante ni pawimawh a nih vanga zahsak tura ngenna memorandum ziakin kan lo thehlut tawh a; MZP chu a dinna ngaiah a la ding reng a ni," an ti.

MZP chuan, Krismas chu Mizo mipui leh zirlaite'n hlim leh thlamuang taka an hman theih nan a ṭul anga hma an lak zel dawn thu sawiin, "Zirlaite chu hlim tak leh thlamuang taka Krismas hmang turin kan chah a ni," an ti a; Mizoramah Krismas ní-a Good Governance Day hmang tura tih chu kaltlangpui a nih loh nan theihtawp an chhuah tur thu an sawi.

MSU pawhin thuchhuah siamin, Good Governance Day chungchanga December 2015-a Prime Minister leh Union HRD Minister hnena memorundum an thehluh tawhin awmzia a nei lo chu pawi an tih thu an tarlang a, "He thil hi Kristiante nêkchêp tumnaah kan ngai," an ti.