Aizawl SP leh CYMA hruaitute'n Hunpuia thawhho dan tur an rêl

Aizawl SP Lalhuliana leh Central YMA hruaitute chuan, Thawhṭanni khan Krismas leh kumthar lo thleng tur mipuite'n thlamuang taka an hman theihna atana thawhho dan tur an sawiho.

Aizawl SP chuan, hunpui lo thleng turah rálmuang tak hnuaia mipuite an awm theih nan December 10, 2016 aṭangin Aizawl khawpui chhung-ah police-te tlaivára an duty ṭan thu a sawi a, "Bawngkawn, Kulikawn leh Vaivakawn police station aṭangin police hlawm hnih ṭheuh siam a ni dawn a, Aizawl Police Station chu an indaih deuh avang-in hlawm thumin an duty ang," a ti.

Sorkarin silai lem, a mu nei chi leh hâlpuah a khapna thupek pawh khauh taka kenkawh a ni tih sawiin Aizawl SP chuan, "Silai lem mu nei chi chu ṭum hnih man a ni tawh," a ti a; hâlpuah puak thâwm hriat tur awm zeuh zeuh mah se, man an la neih loh thu a sawi.

Central YMA hruaitute chuan, mipuite thlamuan turin veng hrang hranga YMA-te chu duty tura an ngen thu sawiin, "Home department leh CYMA-in ruihhlo do kawnga thawhhona an neih angin, hmun hrang hrangah ruihhlo hi khauh taka do a ni," an ti a; YMA hnathawh tichak turin veng hrang hranga YMA duty-te chu police-in tlawh kual ṭhin thei se an duh thu an sawi.