KHAWTHLIR

SIR hmalakna enpui

Election Commission of India deputy director Apurva Kumar Singh chuan nimin khan Reiek a tlawh a, Special Intensive Revision (SIR) of Electoral Rolls hlawhtlinna tura hmalak tawh dante a enpui. Apurva Kumar Singh hi assistant electoral registration officer (AERO) Betty Lalrinfeli leh a thawhpuite'n an lo dawngsawng a, Reiek khuaa chhungkua eng emaw zat tlawhin, booth level officer (BLO)-te'n house to house visit an neih dan a enpui a ni.

VB-G-RAM-G zirtir

Nimin khan Phullen RD Block huam chhunga khaw 12-a VEC leh MATE member-te tan VB-G-RAM-G Act 2025 chungchang inhrilhfiahna hun buatsaih a ni a, Phullen BDO J Lalhmahruaia'n a sawifiah. Phullen BDO chuan, VB-G-RAM-G hnuaiah kum khatah ni 125 inhlawhna thingtlanga chengte tan siam tur a nih thu leh, hmasawnna ruhrel ṭha leh tlo din tum a nih thu a sawi.

MP hoin ṭhukhawm

Aizawl District Develop-ment Coordination & Monitoring Commit-tee (DISHA) chu an chairman, Lok Sabha MP Richard Vanlal-hmangaiha kaihhruaiin nimin khan Planning conference hall-ah an ṭhukhawm a, sorkar laipui scheme hnuaia hmalaknate an thlirho. MP chuan kalkhawmte chu district hmasawnna atan theihtawp chhuah zel turin a chah.

Silaimu man

Zokhawthar Police leh Assam Rifles ṭang dun chuan tun hnai khan Zokhawthar leh Khawmawi inrina Ṭiau leiah Myanmar mi pakhat hnen aṭangin silaimu an man. Silaimu an mante chu 7.62mm paruk, .22mm pahnih leh 5.56mm pakhat a ni. Silaimu kengtu lakah Zokhawthar Police Station-ah thubuai ziah luh a ni.

SIR 2026 sawiho

Lunglei district election officer Navneet Mann, bawrhsap hoin a pisaah nimin khan Election department hotu te, electoral registration officer (ERO) leh assistant electoral registration officer (AERO)-te an ṭhukhawm a, SIR 2026 kalpui meka enumeration form sem, dahkhah leh lak khawm dan an thlirho. Hlawhtling taka SIR kalpui chhunzawm a nih theihna tura thil ṭulte an sawiho bawk.