Corporator-te leh LC member-te tan EMS awareness campaign buatsaih

Sports & Youth Services department chuan nimin khan ATI Auditorium-ah AMC corporator-te leh local council member-te tan Mizoramah infiamna kawnga hma-sawnna a awm theih nan leh veng hrang hranga infiamna pawimawhna hriattirna 'Empowering Mizoram Sports (EMS) Awareness Campaign' an buatsaih a, Sports Minister Lalnghinglova Hmar-in a hmanpui.

Lalnghinglova Hmar chuan, awareness campaign chu Mizoramin infiamna lama hma a sawn theihna tura hun chhinchiah tlak a nih thu a sawi a, "Veng chhung hruaitute'n Bána Kaih scheme hnuaia EMS kalpui dan khawtlang hruaitute'n an hriatthiam a, hma min lakpui chuan Mizoramin infiamna lamah hma nasa taka a sawn belh thei dawn a ni," a ti.

National Games-ah Mizoram dinhmunin duhthu a sâm tawk lo tih sawiin SYS Minister chuan, "International level-ah, a bik takin Olympic thlirin India ram dinhmun a la hniam hle," a ti a; Mizo zingah infiamnaa tui tak tak tam mah se, India level-ah an la thlen san loh avangin EMS kalpui a nih thu a sawi.

Lalnghinglova Hmar chuan, EMS hnuaiah sport discipline thlan bik neiin hmalak mek a nih thu sawiin, "Discipline thlante hi Olympic 2036 hmathlira ruahman a ni a, EMS hnuaiah hian naupang kum 8-15 inkar theihna neite zawn chhuaha teltir tum a ni," a ti a; corporator leh LC member-te chu an venga naupangte chher chhuaktu nih tum turin a chah.

Sorkar thuchhuah tarlan danin, Mizoram sorkar chuan kum 2036-a Olympic thlirin 'The Mizoram Bâna Kaih (Handholding) Policy 2024' hnuaiah Empowering Mizoram Sports a duang. EMS hi Olympic 2036 bakah, khawvel huap inelnaah Mizoramin India ram aiawh tur infiammi a tam thei ang ber a chher chhuah theihna tura hmalakna a ni.

EMS chungchang hre chiang duh leh hming ziak lut duh tan helpline number 8132098626-ah emaw, website ems.mizoram.gov.in ah ngaihven theih a ni.