Minister-in hostel sak mek a enfiah

Nimin zing khan Social Welfare, Women & Child Development minister Lalrinpuii chuan Lunglei Ramthar Venga Working Women's Hostel (WWH) sak lai mek chu a hmunah kalin a enfiah.

Working Women's Hostel hi hmeichhia mahni in luma awm lo a, hmun danga hna thawkte him leh dam taka an hna thawhna hmuna an kal theih nan leh nu nau pawmte pawhin thlamuang taka an kalsan theih nana nau awmna (creche) pawh awm tel thei tura Ministry of Women & Child Development-in a ruahman a ni.

Lungleia WWH hi SASCI Project hnuaia sum hmuh aṭanga sak niin, mi 50 leng thei tura sak tur a ni. A pum pui sak zawh nan hian cheng vbc 14.09 ruahman niin, tunah hian 1st installment cheng vbc 9.29 dawn tawh a ni. PWD enkawlna hnuaiah AIE Construction, Tuikhuahtlangte'n a sak hna hi an thawk.

Building sak hna hi April 14, 2025 aṭang khan bul ṭan niin, duh angin hna a kal chak thei lo. Hna thawktute chuan in sakna bungrua, a bikin rawra lak khawmna kawngah harsatna an tawh thu sawiin, chuti chung chuan theihtawp an chhuah thu Lalrinpuii hi an hrilh.

Kum khat chhunga sak zawh tura ruahman chu an sak zawh a beisei awm loh chungin, Social Welfare Minister chuan ṭha tak leh a rang thei ang bera sa zo tura hma la turin a chah a ni.