Tualthattua puh bail-a chhuahtir duh lohna Tuikual S mipuiin lantir

V Lalhmingthangi (52) w/o C Zothanmawia, Tuikual South thihnaa mawhphurtua puh Irene Lallawmzuali (36), Ramthar North, Aizawl chu court-in bail-in a chhuah nia an hriat avangin Tuikual South mipuite chu nimin khan Aizawl District Court bul MINECO Zero Point-ah an pungkhawm.

Punkhawm hi Tuikual South Local Council leh pawl dangte huaihawt a ni a, mi eng emaw zat an tel. Irene Lallawmzuali bail-a chhuahtir an duh lohna leh hrem ngei an duhna thuziak eng emaw zat an pho lang a, an au rual bawk.

V Lalhmingthangi, Tuikual South hi March 17, 2024 chawhma dar 10 velah New Market, Aizawla a dawr kudamah thia hmuh a ni a, amah thattua puh Irene Lallawmzuali chu March 17, 2024 khan police-te'n an man. Irene Lallawmzuali hian V Lal-hmingthangi hi March 16, 2024 tlai/zanah a vit hlum nia hriat a ni.

V Lalhmingthangi thlavâng hauhin March 26, 2024 khan Aizawl District Court-a a chungthu ngaihtuah laiin Tuikual South mipuite chu MINECO Zero Point-ah an lo pung khawm tawh bawk.