Sapthei chìn hawnna hun hmang

Nimin khan Hliappui auditorium-ah sorkar laipui scheme PM-RKVY-DPR 2025-2026 hnuaia sapthei chìn hawnna hun buatsaih a ni a, minister of state F Roding-liana'n hmanpuiin, ṭanpuinate a sem.

PM-RKVY-DPR 2025-2026 hnuaia sapthei chìn ṭanpuina dawngtu hi Hliappui khuaah mi 51 leh Pàwlráng khuaa mi 39 an awm. Scheme-ah hian ṭanpuina sumfai bakah, hmanrua leh damdawi hrang hrang a tel a ni.

F Rodingliana chuan, sorkar laipui scheme ṭha tak hnuaia Hliappui leh Pawlrang khuaah sapthei chin kalpui a ni tur chu lawmawm a tih thu a sawi a, "Sorkarin kut hnathawktute tan an thlai thar hralhna tur a siamsak hi a vanneihthlak hle," a ti.

Sorkarin an bánah a kaih dawn avangin sapthei chingtu turte chu ṭhu mai mai tur an ni lo sawiin Rodingliana chuan, "Department hotute'n theihtawp an chhuah a, Hma lam pana ke pên zel tur a ni," a ti a; ram hmasawnna leh dinchhuahna chu kut hnathawktute kutah tui tak a innghah thu a sawi.

F Rodingliana chuan, a thlawna pawisa dawn rilru paih a hun tawh thu sawiin, tuna sapthei chin ṭanpuina pawisa an dawnte chu a thlawn a ni lo tih hria tur leh, an dinchhuahna tura sorkarina ṭanpuina sum a pek lâwkna a ni tih hre turin kalkhawmte a chah a ni.