Zirtirtu transfer leh posting rules Council of Ministers-in a pawm

28th January, 2020

Council of Ministers chu nimin khan chief minister Zoramthanga hoin Chief Minister's Office (CMO)-a Cabinet Room-ah an ṭhukhawm a, he thuziah lai thleng hian agenda pakua an pawm tawh. Cabinet chuan, zirtirtu transfer leh posting rules duan thar a pawm a ni.Cabinet meeting-ah hian agenda 20 leh additional agenda pakhat a awm a; hriat theih chinah agenda pakua an pawm tawh a, agenda panga chu ngaihtuah ṭhat leh atan an dah. Zirtirtu transfer leh posting rules duan thar, 'The Mizoram Education (Transfer and Posting of School Education Teachers) Amendment Rules, 2020' chu an sawiho hnuah an pawm.

Inner Line Permit (ILP) pek chhuah dawna fee hrang hrangte tihpun leh chanchinbua advertisement chhuah man tihpun rawtnate pawh Council of Minister chuan an pawm bawk. Additional agenda aṭanga lut, Indian Constitution-a scheduled tribe, scheduled caste leh Anglo-Indian community-te tana reservation awm ṭhin, January 25, 2020 aṭanga tawp tawh, kum 10 chhung pawhsei leh tumna bill chu Council of Minister chuan pawmpui ṭha an ti a; zu khapna dan kalpui dan tur duan, 'The Mizoram Liquor (Prohibition) Rules, 2020' chu hun danga ngaihtuah ṭhat leh atan an dah thung.

Cabinet-in a pawmte

• ILP hnuaia fee-te tihpun rawtna

• Chanchinbua advertisement chhuah man tihpun rawtna

• Mizoram Shops & Establishments (Regulation of Employment and Conditions of Service) Act, 2019 siamṭhat

• Zirtirtu transfer leh posting rules duan thar

• The Mizoram (Registration of Tourist Trade) Bill, 2020

• District thar pathuma District Urban Development Officer post leh post dang siam rawtna

• India Constitution-a scheduled tribe, scheduled caste leh Anglo-Indian community-te tana reservation awm ṭhin pawhsei tumna bill pawmpui

• The Mizoram Animal Slaughter (Amendment) Act, 2020

• The Mizoram (Land Revenue) (Second Amendment) Bill, 2020

Ngaihtuah Ṭhat tura dahte

• MR dinhmun zir chiang a, an awm dan tur duangtu tura sorkarin a din Study Team-te report

• Draft Mizoram Information Service (Competitive Examination) Rules, 2019

• Integration of Civil Sub Divisions with Development Blocks

• Directorate of Nursing siam rawtna

• The Mizoram Liquor (Prohibition) Rules, 2020