KHAWTHLIR

AR-in thisen pe

Lungleia awm 23 Assam Rifles chuan nimin khan thisen pek an huaihawt a, Lunglei Civil Hospital tan thisen unit 38 an pe a, petute mipa 36 leh hmeichhia pahnih an ni.

Zirlai chawimawi

MZP Headquarters, Kolasib chuan nimin khan Kolasib-a Parish Hall-ah kumin HSLC leh HSSLC-a zirlai tiṭhate chawimawina hun an buatsaih. An hun hmanpuitu bialtu MLA Lalfamkima, deputy speaker chuan, zirlaite chu zirlai an nih lai aṭanga tum mumal nei a, kawm tur thliar thiam turin a chah a, "Tunah ṭha tak taka pass kan awm rualin, kan tum tihlawhtling turin kawng a la thui a, inthlahdah loa ṭan lak zui zel a ngai," a ti.

Minister-in hawng

Nimin khan IPR minister B Lalchhanzova chuan Kulikawnah emPOWERu, Training and Development Institute a hawng. emPOWERu training course hian thiamna leh theihna tihhmasawnna tur - communication skill, leadership skill, influencing, personal skill, interpersonal skill, creativity, professional skills leh a dang ṭangkai tak tak a huam dawn a ni.

Kawlphethain a man vangin thi

Simon Lalchungliana (29), Sangau, Mumbai-a hna thawka awm mek chu nimin zing dar 1 vel khan electric current-in a man avangin a thi. Thu dawn danin, Simon-a hi a nau nen Mumabai-ah in luahin an awm a, extension-a mobile phone a charge tur chu electric current-in a man a, damdawi-in panpui nghal ni mah se, chhan theih a ni lo. He thu ziah lai hian a ruang rawn thawn haw hun tur hriat a la ni lo.

Puanṭhui zirna

Mizoram KVI Board chuan SAMART scheme hnuaiah nimin khan Lungleia Art & Culture Auditorium-ah Sewing Machine Operator Training an buatsaih ṭan a, KVIB chairman C Lalremliana'n a hawng. Puanṭhui zirna hi MKVIB Training Centre, Lungleiah kalpui mek a ni a, nimina training ṭante hi batch hnihna niin, mi 25 an a ni. Training tluante hnenah bul an ṭan nan puanṭhui khawl pek vek an ni ang.