Young Indians Parliament zo ta

Young Indians (YI) Mizoram Chapter chuan nimin khan Assembly Annexe conference hall-ah Young Indians Parliament an buatsaih chhunzawm a, Parliament ni hnihna leh a zawhna ni hi MLA Baryl Vanneihsangi'n a hmanpui.

Baryl Vanneihsangi chuan, politics-ah zirna a pawimawh thu sawiin, "Lehkha thiam loa ram hruai tum chu mipui tan a him lo. Politics bulpui ber chu mipui rawngbawl hna a ni a, mipui rawngbawl hna hi kawng awlsam a ni lo a, huaisenna, rinawmna leh inpekna a pawimawh," a ti.

Zirna pawimawhzia sawiin Baryl-i chuan, "Zirna chuan mi rinawmah min siam thei a, thil dik leh dik lo thliar hrang thei turin min pui. Ram hruaitu ṭha ni tur chuan zirna hi a lungphum pawimawh ber a ni," a ti a; ram rawngbawl turin naupan luat a awm loh thu a sawi.

YI Mizoram Chapter chairman Alan Lalhriatpuia pawhin inlawmna thu a sawi a, intihsiaknaa tel zirlaite duhsakna a hlan.

Intihsiaknaah hian Hannah Lallawmpuii chu chief judge niin, Dr Jerry Lalmuansanga leh Dr F Lalramhluni te judge an ni a, MP hlui Vanlalzawma leh MLA Baryl Vanneihsangi te special jugde an ni.

Intihsiak ni hnihna hi Matters of Urgent Public Importance sawihonain ṭan a ni a, constituency hrang hrang aṭanga sawihona neih a nih hnuah intihsiak chhunzawm a ni.

Intihsiaka tel naupangte chuan hlawk-thlak an tih thu sawiin, "Hetiang platform hi ṭhalaite'n an mamawh a, hetiang intih-siakna YI Mizoram Chapter-in a buatsaih hi lawmawm," an ti a, YI Mizoram Chapter-in buatsaih chhunzawm zel an duh thu an sawi.