World Environment Day hman a ni

Nimin June 5 kha World Environment Day a ni a, Mizoram Pollution Control Board (MPCB) leh Mizoram EIACP Hub te chuan Aizawl leh district khawpui tinah hmangin, thing an phun bakah, leilung leh a chhunga awmte humhim tura inzirtirna beihpui an thlâk.

World Environment Day pual hian Aizawl New Market leh district khawpui hrang hrang bazar lûn laiahte inzirtirna hun hman a ni a; hman khat daih sarâng ip aiah ṭawih thei - lehkha leh puan lam chi ip (bag) hmang zawk tur leh kawlphetha renchem turin mipui an ngen. Mi ṭhahnem tak hnenah a thlawnin puan ip (cloth bag) an sem a, sarâng ip hmangzui tawh lo tur leh kawlphetha renchem tura intiam theite chu intiamna hming an ziahtir zel a ni.

Environment Day pual hian thing phun rûnpui huaihawt a ni bawk a; Aizawlah chuan MPCB chairman Liankima Lailung hoin Industrial Growth Centre, Luangmualah MPCB leh Aizawl DFO pisa leh Industries de-partment ten thing an phun a, MINECO huam chhungah an phun bawk.

Aizawl bakah, Mamit Ngharpet Venga MPCB pisa leh DFO pisa ten thing eng emaw zat an phun a; MPCB leh Ministry hmalaknain district hrang hranga eco-club eng emaw zatin an remchânna hmunah thing phun rûnpui an nei bawk a ni.

World Environment Day hi MPCB chuan sum hautak lo zawng leh bawlhhlawh siam chhuak tam lo zawnga nun a pawimawhzia mipui zirtirna beihpui thlâk nan an hmang bawk.