AMC-in Solid Waste Management Rules 2026 hlawhtlinna atan theihtawp chhuah an rêl

Aizawl Municipal Corporation (AMC) Board of Corporators (BoC) nimina ṭhukhawm chuan, Solid Waste Management Rules, 2026 hlawhtling taka hman a nih theih nan theihtawp chhuah an rêl.

AMC BoC hi nimin khan mayor H Lalremtluanga kaihhruaiin an ṭhu a; World Environment Day puala Special Meeting nei tura Swachh Bharat Mission – Urban (SBM-U) National Mission Director-in hriattirna a chhuah bawhzuia neih a ni.

BoC ṭhukhawm chuan bawlh-hlawh sawngbawlnaa AMC hmalakna turte an sawiho a; bawlhhlawh sawngbawl dan thar - Solid Waste Management Rules, 2026 hlawhtling taka hman a nih theih nan theihtawp chhuah turin resolution an siam.

SWM Rules 2026-in a sawi angin, corporator (lead facilitator)-te kaihhruainain ward tinah hmalak ṭha an ti a; SWM Rules, 2026-in min phût angin bawlhhlawh hlawm lia thliar hran chungchang hi ward tinah mipui zirtirna nasa taka kalpui ni se, a hmun loa bawlhhlawh paihna hmunte zawng chhuakin, tihfai hna thawh ni se," an ti.

Sikul leh biak-inah faina beihpui thlak (Special Drive Campaign) neih an rêl a; Solid Waste Management Centre, Tuirialah corporator-te'n thing phun belh te, faina lam hawi video clip leh auhla (slogan) insiamsiak buatsaih an rel bawk.