Bungraw hlui dah khawmna leh lak chhuahna hmun hawn a ni

Bana Kaih (Handholding) hnuaia Mizoram District Transformation Programme (MDTP), Lunglei district hma-laknaa din, Lungleia hman nawn theih bungraw dah khawmna leh lak chhuahna hmunpui, 3R (Reduce, Reuse, Recycle) Centre hmasa ber chu nimin khan Lunglei bawrhsap Navneet Mann-i'n a hawng.

Lunglei Bawrhsap chuan, 3R Centre chu Mizo hnam zia - mi dang ṭanpui duhna rilru nen a inrem hlea a hriat thu sawiin, "In chhungkhura kan bungrua leh thawmhnaw hlui, kan hman ṭangkai loh leh hmun awh khat site hmang ṭangkai tur leh mamawh zawkte'n an lo chhawr theih nana 3R Centre-a dah hi intihhmuh zel a ṭha," a ti.

Project hi Lunglei District Urban Development Office-in an buaipui a; bawlhhlawh tihtlem, hman nawn leh ṭangkai zawka hman a nih theih nana bungraw hlui, la hman tlakte dah khawmna leh a thlawna lak theihna hmun atan ruahman a ni.

3R Centre hi Lunglei Chanmari BCM biak-in epah a awm a, ni tin pisa hun chhungin hawn ṭhin a ni dawn. Tun ṭumah hian Lunglei khawpuia MHIP branch pasarih aṭangin bungrua khawn khawm a ni a, June thla tawpah MHIP branch pasarih dang leh a bak branch pariat dang aṭangin July thlaah khawn leh tum a ni. Hemi piah lamah hian mimal remchangte thawh khawm aṭangin hlawhtling taka kalpui zel theih beisei a ni.