MAHCO hi mite eizawnna petu a ni - Commerce & Industries Minister

Mizoram Apex Handloom & Handicraft Cooperative Society (MAHCO) chuan nimin khan IPR Auditorium-ah inkhawmpui an hmang a; khuallian Commerce & Industries minister F Rodingliana chuan, MAHCO chu mi tam tak eizawnna petu a nih thu a sawi.

F Rodingliana chuan, India ram hmun hrang hrangah cooperative society-te dinhmun a pawimawh thu a sawi a, "Mizoramah pawh kawng tam taka state intodelhna tura ban pawimawh an ni a, MAHCO hi mi tam tak eizawnna petu a ni. Mizo puantah leh thiamhnâng hmanga siam chhuah thilte hi hnam dang pawhin min hlutpui hle," a ti.

Mizo puantah leh thiamhnâng hmanga thil siamte chu hnam hmêl tilangtu leh hnam ro hlute vawn ṭhatna pawimawh a nih thu sawiin Minister chuan, "Sorkar laipui chuan ruahmanna changtlung tak nen handloom industry tihhmasawn dan tur a ruahman," a ti a; Mizoram pawhin sorkar laipui rua-hmanna hlawhtlinna a hmuh zel thu a sawi.

Cooperative registrar John LT Sanga pawhin thu sawiin, "Handloom industry hi mi tam tak eizawnna siamsaktu a nih angin sorkar pawhin a ngai pawimawh. Computeri-sation of RCS Office hmalakna hnuaiah primary society-te'n dilna an thlen ṭhinte pawh district cooperative officer-te kaihhruai-nain online veka kalpui tawh tur a ni," a ti.

MAHCO hi kum 1977 khan din a ni a, an hnuaiah cooperative society 96 an awm mek. Mizoramah puantaha ei zawng mi 25,134 an awma ngaih a ni.