LMC-in Lalrinpuii lawmpuina an hlan

Lunglei Municipal Council (LMC) chuan June 4, Ningani khan minister Lalrinpuii, Lunglei East bialtu MLA chu National Women's Icon Award a dawn avangin lawmpuina an hlan.

LMC Board of Councillors meeting hall-a inkhawm buatsaihah minister Lalrinpuii chuan, award a dawn chu ama mimal thil tih ṭhat vang nia a hriat loh thu a sawi a, "Award min petute'n ka chanchin aṭanga an ngaihhlut ber chu Mizoram Universal Healthcare Scheme leh ruang phurhna kan tihhlawhtlin niin ka hria. A tihlawhtling thei tura zirchianna leh ruahmanna kalpuitute leh a hlawhtlin tak takna tura Chief Minister leh ka thawhpuite inhawnna zar ka zo a ni," a ti.

Lalrinpuii chuan, award hlanna inkhawmah India mi pawimawhte leh ram danga an thawhpui eng emaw zat an tel thu sawiin, "Mizoram chu India ram hmarchhak kila awm, mihring tlemna kan nih avanga CSR sumte pawhin a thlen phak loh thu ka sawi a, hma min lakpui turin kal khawmte a sawm," a ti a; CSR aṭangin Civil Hospital, Lungleia CT scan khawl thar tur bakah, MRI khawlte nei thei tura beisei a nih thu a sawi.

LMC chairman Lalzuithanga pawhin thu sawiin, Lalrinpuii'n award a dawng chu LMC-in a lawmpuiin a chhuang hle tih a sawi a, "Award a dawng tih kan hriatin LMC anga chawimawina hun buatsaih kan duh a, lawmpuitu neuh neuh an awm avangin a hnukhawiah kan che thei chauh a ni," a ti. Lalrinpuii chu Lunglei tan mai ni lo, Mizoram tan chhuan tham a nih thu a sawi bawk.