MTM-in MizoTaxi hman ṭha an ti; Sorkar leh taxi-te inrem turin ngen

Mizoram Transformation Movement (MTM) chuan thuchhuah siamin, MizoTaxi application hmang tura sorkarin hma a laknaah, mipui tana ṭha tur a nih avangin inrem theih dan zawng turin sorkar leh taxi neitute leh khalhtute an ngen.

MTM chuan MizoTaxi app hman tura ruahmanna chu hmasawnna rahbi nia an hriat thu tarlangin, "Mipui tan a ṭhatna a tam hlein a lang. Awlsam zawka hmun hrang hrang aṭanga taxi hman tur mipuite'n kan hmuh theihna tur te, man chawi tur zat chiang zawk leh tlawm zawk, langtlanga a awm turte hi a ṭhatna niin a lang," an ti.

MizoTaxi app-a inziah luh man pek a ngai chu lirthei neitu leh khalhtute tan harsatna leh dodalna siamtu nia a lan thu sawiin MTM chuan, an inziah luh man chawi ngai loa siamsak turin sorkar an ngen.

Taxi neitu leh khalhtute chu MizoTaxi chungchang uluk taka ngaihtuaha thutlukna siam tura ngenin MTM chuan, "Tlawm zawk leh awlsam zawka taxi kan book theih a, kan hman theih chuan tun ai hian mipui tam zawkin taxi kan hman phah ang a, public transport hmasawnna hmanraw pawimawh tak a nih avangin public transport-in nasa takin hma a sawn phah ngei kan beisei," an ti.