Kawrthah North VC-in lawmman dawng

Kawrthah North Village Council chuan June 3, Nilaini khan Scope Convention Centre, New Delhi-ah National Panchayat Awards hlanna inkhawmah VC ṭha lawmman an dawng.

India rama panchayat/VC-te zinga ram pum huap lawmman (National Panchayat Award) hmute chawimawina leh lawmpuina hunah hian Union Panchayati Raj minister Rajiv Ranjan Singh-a'n category hrang hranga award dawngte hnenah nomawi leh thuchei a hlan a; Panchayati Raj minister of state Prof. SP Singh Baghel-a'n lawmpuina leh fuihna thu a sawi.

Mizoram aṭanga Localization of Sustainable Development Goals (LSDG) theme panga - 'Clean & Green Village’ category hnuaia Deen Dayal Upadhyay Panchayat Satat Vikas Puraskar lawmman dawngtu Kawrthah North VC hian Panchayati Raj Minister hnen aṭangin nomawi leh thuchei an dawng a ni.

Award-in a ken tel cheng nuai 100 chu Kawrthah North VC bank account-ah thun a ni tawh a; khaw hmasawnna hna thawhna atan hman tur a ni.