February aṭangin biak-inah A inkhawm theih tawh dawn
Nimin khan Health & Family Welfare minister Dr R Lalthangliana hoin Secretariat conference hall-ah Covid-19 Review Meeting neih a ni a; February 2021 aṭangin Pathianni chhun leh Inrinni (sabbath) chhunah inkhawm phal ṭan an remti a, kumina HSLC leh HSSLC exam turte chu January 22, 2021 aṭangin sikul kaltir an remti bawk.
Ṭhutkhawmah hian Mizorama Covid-19 dinhmun thlirin, inkaihhruaina hman mek chu thlahdul hret an remti a; February thla aṭangin Pathianni chhun leh Inrinni chhunahte biak-ina inkhawm neih ṭan theih tawh turin an rél a ni.
Sorkar thuchhuah tarlan danin, biak-ina inkhawmah hian Ministry of Home Affairs-in inkaihhruaina a siam angin, ṭhutna awm zat (seating capacity) aṭanga a zatve (50%) emaw, mi 200 aia tam lo emaw (a tlem zawk zawk) tel theih a ni ang.
HSLC leh HSSLC exam tur pawl 10 leh 12 zirlaite chu January 22, 2021 aṭangin sikul kal chhunzawmtir an rél a; board exam turte hi hostel-a luh phalsak an ni bawk a, hostel-a luh hmain Rapid Antigen Test (RAT) hmanga swab sample endik hmasak vek tur a ni thung. Heng chungchanga inkaihhruaina kimchang chu State Disaster Management Authority hnuaia State Executive Committee-in an siam tura dah a ni.
Meeting-ah hian, chhiatni ṭhatnia punkhawm theih zat tihpun an rêl a, zan curfew pawh thlahdul ni se, an ti. Aizawl khawpuia lirthei tlân dan pawh tihdanglam tur a ni.
Mizoram páwn aṭanga state chhunga rawn lutte swab sample endik dan leh inkhungtir danah ruahmanna siamṭhat an rél a; kalpui dan tur chu Health department-in an siam ang. Sumdawnna hmun bakah, hotel, picnic spot, gym leh infiamna hmunhma hman dana inkaihhruaina pawh thlahdul hret an rél bawk.
Heng atana inkaihhruaina thar hman ṭan hun leh kalpui dan tur kimchang chu SDMA hnuaia State Executive Committee-in an duang ang.
Ṭhutkhawm hi Health minister Dr R Lalthangliana'n a kaihruai a, Home minister Lalchamliana, School Education minister Lalchhandama Ralte, IPR minister Lalruatkima, Covid-19 Medical Operation Team chairman Dr ZR Thiamsanga, MLA, chief secretary Lalnunmawia Chuaungo, department hrang hrang hotu te, Mizoram University, Mizoram kohhran Hruaitute Committee, Joint NGO Coordination Committee leh Indian Medical Association aiawhte an tel a ni.
Meeting-a an tarlan danin, thla khat kal ta December 15, 2020 aṭanga January 14, 2021 chhung khan Mizoramah Covid-19 vei mi 267 hmuh chhuah a ni a, an zinga mi 137 (51.31%) chu Mizoram páwn aṭanga rawn lut niin, Mizo 25 leh hnam dang 112 an ni. Mi 137 zinga 45 chu paramilitary force mi an ni bawk.