COVID-19: Mizoram dinhmun Chhuahtir tawh zat 97.73%

January 14, Ningani khan Mizorama district tinah swab sample 1,036 endik ni mah se, Covid-19 vei hmuh chhuah a ni lo. Nimin khan hripui laka fihlim tawh mi pasarih chhuahtir an ni a; Mizorama Covid-19 positive hmuh tawh mi 4,310 zinga 4,212 chhuahtir ni tawhin, 97.73% a tling.

Ningani khan ZMC Covid-19 laboratory-ah RT-PCR hmangin mi 382-te swab sample endik a ni a; Aizawl district tih loh district dang zawng (district 10)-ah TrueNAT-PCR hmangin sampe 133 leh Rapid Antigen Test hmangin sample 521 endik a ni bawk. Ningania swab sample endik zawng zawng chu 1,036 a ni.

Nimin khan Covid-19 laka fihlîm tawh mi pasarih chu enkawlna hmun aṭangin chhuahtir an ni a; SRH-ZMC aṭangin mi paruk leh Lunglei Sazaikawn CCC aṭangin mi pakhat an chhuak. 

Mizorama Covid-19 vei hmuh chhuah tawh chu mi 4,310 an ni a, mipa 3,160 leh hmeichhia 1,150 an ni. Nimin tlai dar 5 thleng khan damin mi 4,212 (97.73%) chhuahtir an ni tawh a, mi pakua (0.21%) thi tawhin, enkawl mek mi 89 (2.06%) an awm.

Mizoramah swab sample 1,91,078 endik a ni tawh a, chu'ng aṭang chuan Covid-19 positive mi 4,310 hmuh chhuah niin, endik zat aṭangin 2.25% a ni.

Covid-19 vei hmuh chhuah tawh mi 4,310 zinga mi 2,041 chu Mizoram chhunga kái chhâwng an ni a; mi 2,269 chu Mizoram páwn aṭanga an rawn luh hnua hmuh chhuah an ni.

Mizorama district 11 zinga panga - Siaha, Champhai, Serchhip, Mamit leh Hnahthial district-ahte Covid-19 vei an awm rih lo.

Mizoram páwn    58    1 (GMC)

ZMC laboratory    94,762    2,617

TrueNAT-PCR    17,530    663

RAT    78,746    1,029