ZMCH leh CHA-a power tihchangtlun dan tur minister pahnihin an enfiah

Health & Family Welfare minister Lalrinpuii leh Power & Electricity minister F Rodingliana te chuan June 6, Inrinni khan Civil Hospital, Aizawl leh Zoram Medical College & Hospital an tlawh a; chhum lo chat loa kawlphetha (power supply) pekna tur leh hmalakna tur hmachhawp dangte an enfiah.

Minister-te hian Civil Hospital, Aizawl bikah damdawi-in châwmtu tur bik dedicated power line siam hna thawh bul ṭan dan tur an en. Ruahman dan chuan, Civil Hospital power line hi direct-in Indoor Sub-Station aṭanga lak tur a ni a, cheng nuai 100 chuang ruahman a ni

Aizawl Civil Hospital-a power supply a khaihlak chánga damdawi-in pumpui châwm thei tur 500 kVA diesel generator dahna tur hmun en nghal a ni a; ICU, Blood Bank, Haemodialysis Unit leh Operation Theatre te châwmtu tur power back-up keng tel 20kVA Solar Plant dahna tur an en bawk.

Sorkar thuchhuah tarlan danin, diesel generator leina tur hi PE department kutah pawisa pek tawh a ni a, bun thuai tum a ni.

Minister-te hian ZMCH-ah NESIDS (OTRI) aṭanga hmuh cheng vbc 13.14 hmanga solar power plant megawatt 1.5 bunna tur an en a; solar plant aṭanga kawlphetha siam chhuahte ZMCH chhunga sem kualna tur metre 1,000-a thui distribution line leh 500kVA distribution transformer thar pathum dah belh dan tur an en bawk. ZMCH-a solar plant dah tur 1.5 MW aṭang hian 1.2 MW chu On-Grid tur a ni a, 0.3 MW chu hybrid mode vuah tur a ni.

Ruahmannate hi damdawi-in liante hnena khaihlak lo (24X7)-a kawlphetha pekna tur a nih thu minister-te chuan an sawi a; a bikin hmun pawimawh zual - ICU, Blood Bank, Haemodialysis Unit leh Operation Theatre te thlur bing zual a nih tur thu leh, hun rei lo têah hna thawh ṭan a nih tur thu an sawi bawk.