AR-in Ruihhlo Do campaign kalpui

46 Assam Rifle chuan nimin khan Lammualah Ruihhlo Do Campaign thawh hnihna an buatsaih a, khuallian Home minister Lalchamliana chuan India ramah kum 1985 aṭang khan ruihhlo dona tur dan siam a nih thu a sawi.

Home Minister chuan ruihhlo dona dan chu a ṭhat rualin a kenkawhna kawngah chak tawk a har hle tih sawiin, "Mizoram bikah chuan Excise leh Police bakah  Assam Rifle-ten tha an thawh hlawk hle a, an ni piah lamah NGO hrang hrang ten tan an la nasa ṭhin chu lawmawm. NGO leh kohhranten a bikin tha thawh leh zual thei se a hlawk hle ang," a ti.

Khawchhak lama ruihhlo lo kal check leh lo dap chhuah kawngah ṭan lak a ngaih thu sawiin Lalchamliana chuan, "Assam Rifle-te hian hemi kawngah hian an thawk ṭha hle a, hei aia nasa zawk hian ṭan an la lak theih ka ring," a ti a, ruihhlo chu a kawng bera a lo kaltlang theih loh chuan a tlem sawt tur thu a sawi.

Home Minister leh Mascot of Anti-Drug campaign atana hman naupang zaithiam Esther Hnamte chuan khaw hrang hranga road show neia kar khat chhung thawk chhuak turte an vailiam.