Sorkar scheme hre bel chunga thawk turin Minister-in Agri officer-te a fuih

Agriculture & Farmers’ Welfare minister PC Vanlalruata chuan June 5, 2026 khan Berawtlang Tourist Complex-ah Mizoram Agriculture Service Association (MASA) General Conference a hmanpui a; loneitute hlâwkna tura thawk an ni tih hria a, sorkar scheme-te bel taka hre chunga thawk turin a fuih.

PC Vanlalruata chuan, MAS officer indaih lohna a nasa tih sawiin, "Post ruakte hnawhkhah a nih theih nan a ṭul angin recruitment kalpui zel a ṭul," a ti a; MAS member-te chu hna an thawhnaah theihtawp chhuah tur leh, an hna chu loneitute tana hlâwkna tur a ni tih hre chunga sorkar scheme-te bel taka hre chunga thawk turin a chah a ni.

MAS officer-te chu sorkarin a dahna pianga awm zel thei tura chahin Vanlalruata chuan, "Agriculture & Farmers’ Welfare department-ah mipuiin beiseina sang tak an nei a, an beiseinate timittu ni loin, tihlawhtlingtu ni thei turin a ṭul ang zelin mahni insiamrem ila, sorkar leh mipui tan theihtawp chhuah zel ang u," a ti.

MASA inkhawmpuiah hian an member thite sûnna hun leh kaisang tharte leh member tharte lawmpuina hun hman a ni a; 'Production Technology of Oil Palm' tih thupui zirho a nih bakah, kum 2026-2028 chhunga hruaitu turte an thlang. Mizoram Agriculture Service-ah hian post 120 a awm a, post 54 hnawhkhah niin, post 66 a ruak a ni.