SIR-ah voter 7,78,653 hnenah enumeration form sem a ni tawh

Mizoram electoral roll ennawn rûnpui, Special Intensive Revision 2026 (SIR) chu ngawrh taka buaipui mek zel a ni a; June 5, 2026 thleng khan Mizoram pumah voter 7,78,653 hnenah SIR-a inziah luhna tur enumeration form sem a ni tawh.

Sorkar official-te tarlan danin, Mizoram electoral roll hman laiah voter 8,75,068 an awm a, chung zinga mi 7,78,653 hnenah chuan June 5, 2026 thleng khan SIR enumeration form pek tawh a ni a, form pek tawh hi voter zawng zawng aṭangin 88.98% a tling. Enumeration form hi khua/veng hrang hrangah BLO-te'n an sem mek zel bawk.

Hetihlai hian, Serchhip district-ah chuan June 6, Inrinni khan SIR enumeration form sem zawh a ni a, sem zo hmasa ber district an ni. June 6 khan mobile van hmangin form thehluh kawnga harsatna awm theihna hmunte official-te'n an tlawh a; district election officer Paul L Khuma chuan, tluang taka SIR 2026 zawh a nih theih nan ṭhahnemngai taka thawk zui zel turin thawktute leh mawhphurtute a sáwm a ni.