Vawiinah vaccine pe dawn

Vawiin hian India ram pumah Covid-19 laka invenna damdawi (vaccine) pek chhuah ṭan a ni dawn a, Mizoramah pawh pek chhuah nghal tur niin, hmun paliah a dawng hmasa tura thlante hnenah pek a ni ang.

Covid-19 vaccine hi vawiin chawhma dar 10-ah prime minister Narendra Modi-a'n video conferencing kaltlangin a tlangzarh dawn a, Mizoram aṭangin Health minister Dr R Lalthangliana hoin an tel dawn. Prime Minister-in a tlangzarh hnuah Covid-19 vaccine chu healthcare worker-te pek ṭan nghal tur a ni.

Vanglaini palai zawhna chhángin COVID-19 Vaccination Drive thupuangtu Dr Lalzawmi chuan, vaccine pe turin ruahmanna uluk taka kalpui a nih thu a sawi a, "Social distancing ṭha taka zawm a ni ang. Vaccine pekte hi pek an nih zawhah darkar chanve chawlhtir zel an ni dawn a, chumi hnuah pekna hmun chhuahsan chauh tur a ni," a ti.

Covid-19 vaccine hi Aizawla hmun pathum - Aizawl Civil Hospital, ITI Veng Urban PHC leh Zoram Medical College leh, Civil Hospital, Lunglei aṭanga pek chhuah tur a ni.